საბურთალოს პოლიციის განყოფილებასთან დღეს, 18 ივლისს ზვიად კუპრავას მიმართ გამოტანილი განაჩენის გასაპროტესტებლად აქცია გაიმართა. აქციის მონაწილეებმა პოლიციასთან საკვები მიიტანეს და ერთმანეთის თეფშებიდან ჭამეს.

აქციის მონაწილეები ამბობენ, რომ ამ პერფომანსით ზვიად კუპრავასთვის წაყენებული ბრალის იმ ნაწილს აპროტესტებდნენ, სადაც აღნიშნულია, რომ ის სასამართლოს უპატივცემულობას გამოხატავდა და დროის გაჭიანურების მიზნით სხვისი თეფშიდან ჭამდა.

"ზუსტად ახლა რა მოქმედებასაც ვასრულებ, ამ მოქმედებისთვის ზვიად კუპრავას ემუქრება ორწლიანი პატიმრობა. ეს არის დღევანდელი ხელისუფლების სახე, ასეთი აბსურდული ბრალდებებით ადამიანს ემუქრება 2-წლიანი პატიმრობა", - განაცხადა ზვიად კუპრავას მეგობარმა, ლაშა ცუცქირიძემ რუსთავი 2-თან საუბრისას.

საქალაქო სასამართლოს სასადილოს ინციდენტის საქმეზე, ზვიად კუპრავას ბრალი 9 ივლისს სასამართლოს უპატივცემულობისთვის წაუყენეს და მისი დამტკიცების შემთხვევაში ორ წლამდე პატიმრობა ემუქრება.