აშშ-ს პრეზიდენტის, დონალდ ტრამპის თქმით, ის ეთანხმება ამერიკის სადაზვერვო სამსახურის დასკვნას იმის შესახებ, რომ რუსეთი 2016 წლის საპრეზიდენტო არჩევნებში ჩაერია:

"ალბათ სხვებიც იყვნენ, ბევრნი არიან".

BBC-ცნობით, ამის შესახებ დონალდ ტრამპმა პრესკონფერენცია გამართა. მან ეს განცხადება მას მერე გაავრცელა, რაც ჰელსინკიში, პუტინთან ერთად გამართული შეხვედრისას, ჟურნალისტის კითხვის პასუხად უარყო რუსეთის ჩარევა არჩევნებში. მან თავისი ნათქვამი დაშვებული შეცდომით ახსნა.

რას ამბობდა ტრამპი მანამდე

რეპორტიორი: "პრეზიდენტმა პუტინმა უარყო რაიმე სახის ჩარევა 2016 წლის არჩევნებში. ამასთან, აშშ-ს უსაფრთხოების სამსახური ამტკიცებს, რომ რუსეთმა ეს გააკეთა. ჩემი შეკითხვაა, ვისი უფრო გჯერათ"?

დონალდ ტრამპი: "ჩემმა ხალხმა მითხრა, რომ ეს რუსეთია. აქ მყავს პრეზიდენტი პუტინი. ის ამას უარყოფს. მე ვიტყოდი, ვერ ვხედავ მიზეზს, რატომ უნდა ყოფილიყო...".

რას ამბობს ტრამპი ახლა

ტრამპმა განაცხადა, რომ მან გააანალიზა თავისი ნათქვამი და საჭიროდ ჩათვალა განემარტა:

"მთავარ წინადადებაში, მე ვთქვი სიტყვა "უნდა" იმის ნაცვლად, რომ მეთქვა "არ უნდა".

ტრამპის თქმით, წინადადება შემდეგნაირი უნდა ყოფილიყო:

"ვერ ვხედავ მიზეზს, რატომ არ უნდა ყოფილიყო რუსეთი".

დონალდ ტრამპი აღნიშნავს იმასაც, რომ რუსეთის ჩარევას არანაირად არ უმოქმედია არჩევნებზე, სადაც მან დემოკრატების კანდიდატი, ჰილარი კლინტონი დაამარცხა.

ამავე თემაზე:

პუტინისა და ტრამპის შეხვედრა - მოლაპარაკებები კონკრეტული შედეგების გარეშე