დუშეთის მერმა, ზურაბ სეხნიაშვილმა On.ge-სთან დაადასტურა, რომ დუშეთში ბავშვის ცხედარი პოვეს. სავარუდოდ, ეს ხადას ხეობაში დაკარგული ოთხი წლის ბავშვის ცხედარია, რომლის მშობლები 6 და 7 ივლისს გარდაცვლილები იპოვეს. მერის განმარტებით, დამატებით ინფორმაციას შსს გაავრცელებს.

Reginfo-ს ინფორმაციით, ცხედარი დამარხული იყო და მისი ადგილსამყოფელი პოლიციას მკვლელობაში ბრალდებულმა მწყემსმა მიუთითა. ბავშვის ცხედრის პოვნაზე შსს-ს განცხადება ამ დრომდე არ გაუკეთებია.

6 ივლისს, 112-ში შევიდა შეტყობინება საქართველოსა და ამერიკის ორმაგი მოქალაქეობის მქონე 2 პირის და მათი 4 წლის შვილის დაკარგვის შესახებ. შეტყობინების ინიციატორის თქმით, დაკარგულები დუშეთის რაიონში, ხადას ხეობაში იმყოფებოდნენ და მათთან დაკავშირება ვერ ხერხდებოდა.

პოლიციელებმა სოფელ წკერეში დაკარგული ტურისტების კუთვნილი ავტომანქანა და პირადი ნივთები აღმოაჩინეს. მაშველებმა დაკარგული ტურისტი ქალი, ავტომანქანიდან, დაახლოებით, 3 კილომეტრში, ხევში, ჩანჩქერის ძირში გარდაცვლილი 6 ივლისს იპოვეს. რაიან სმიტის ცხედარი 7 ივლისს, ხევში მდებარე ჩანჩქერის მიმდებარე ტერიტორიაზე ნახეს. იქვე ახლოს ნახეს მათი კუთვნილი ნივთებიც, ჩანთაც და ფულიც.

გამოძიება საქართველოს სისხლის სამართლის კოდექსის 116-ე მუხლის მე-2 ნაწილით მიმდინარეობს, რაც გაუფრთხილებლობით სიცოცხლის მოსპობას გულისხმობს.

რაიან სმიტი მეუღლესთან ერთად დაახლოებით 7 წელია, რაც საქართველოში, მარნეულში ცხოვრობდა და აზერბაიჯანული ხალიჩების ბიზნესით იყო დაკავებული.

მიუხედავად იმისა, რომ გამოძიება გაუფრთხილებლობით სიცოცხლის მოსპობის მუხლით დაიწყო, ადგილობრივი გამოცემა მთის ამბები ოფიციალურო ვერსიისგან განსხვავებულ ინფორმაცია ავრცელებს და წერს, რომ ამერიკელი ცოლ-ქმარი შესაძლოა მოკლულები არიან. აღნიშნულ ინფორმაციას გამოცემა ხადას ხეობაში მაცხოვრებლების საუბრებზე დაყრდნობით ავრცელებს.

აღნიშნულ ინფორმაციას არ ადასტურებენ შსს-ში. On.ge-ს უწყებაში განუცხადეს, რომ მიმდინარეობს გამოკითხვები და გამოძიება ყველა მიმართულებით მუშაობს. კითხვაზე მუშაობს თუ არა გამოძიება მკვლელობის ვერსიაზე, შსს-ში არ გვპასუხობენ.

შსს-ს მიერ ოფიციალურად გავრცელებულ განცხადებაში აღნიშნულია, რომ პირველადი დათვალიერებით, არცერთ გარდაცვლილს ძალადობის ნიშნები არ აღენიშნება. ოფიციალური პასუხი სავარაუდო დაზიანებების შესახებ ექსპერტიზის დასკვნის შემდეგ გახდება ცნობილი.