მაღაზიათა ქსელ ნიკორას თანამშრომლები კომპანიას შრომითი უფლებების დარღვევაში ადანაშაულებენ. მათი თქმით, მათ საწყობში დარჩენილი ვადაგასული პროდუქციის ყიდვას ავალდებულებენ.

"ის კი არა რომ დახლზე დევს ვადაგასული პროდუქტი და მომხმარებელს ვუქმნით საფრთხეს და მაგის გამო დაგვსაჯონ, არა, საწყობშიც რომ არის და ვადაგასულია, ვერ განსაზღვრეს შეკვეთა, ისიც შენ უნდა იყიდო იმიტომ, რომ მომწოდებელი არ იბრუნებსო, ასე ამბობენ", - უყვება იმედის დილას ნიკორას მაღაზიის მოლარე-ოპერატორი შორენა ლობჟანიძე.

ნიკორა ამ ბრალდებებს უარყოფს. კომპანიის პრესსამსახურში On.ge-ს უთხრეს, რომ თანამშრომლის მოვალეობაა, ვადაგასული პროდუქტი თაროზე არ დარჩეს. კომპანია განმარტავს, რომ თაროზე დარჩენილი ვადაგასული პროდუქციის ღირებულებას თანამშრომელი იხდის.

ნიკორას ოთხ თანამშრომელს იურიდიულ დახმარებას დამოუკიდებელი პროფკავშირები სოლიდარობის ქსელი უწევს. სქელის წევრმა, თეონა კუპრაძემ On.ge-ს უთხრა, რომ კომპანიის პასუხი მოულოდნელი არ იყო.

მისივე თქმით, საჭიროა, რომ შრომის ინსპექციამ გამოკვლევა ჩაატაროს და ფინანსური დოკუმენტაცია შეისწავლოს. როგორც კუპრაძემ განმარტა, ნიკორას სხვა თანამშრომლებთან მსგავსი პრობლემა აქამდეც ჰქონიათ.

ნიკორას თანამშრომლები ამბობენ, რომ ხელშეკრულების მიხედვით ზეგანაკვეთური მუშაობის ვალდებულება აქვთ. თეონა კუპრაძემ განგვიმარტა, რომ შრომით ხელშეკრულებაში მსგავსი პუნქტი არაკანონიერია:

"შრომის კოდექსში არის ჩანაწერი, რომ ზეგანაკვეთური სამუშაო ითვლება პერიოდულ სამუშაოდ, ანუ შეიძლება მოხდეს ათასში ერთხელ და არ უნდა ჰქონდეს მუდმივი ხასიათი. შრომის კოდექსით მუდმივად ზეგანაკვეთურად მუშაობა არის არაკანონიერი".