ხორავას ქუჩის საქმის საგამოძიებო კომისიის 3 ივლისის სხდომაზე, კომისიის თავმჯდომარემ, სერგი კაპანაძემ თქვა, რომ პროკურორ ზვიად ფხაკაძესა და საქმის უშუალო გამომძიებელს, ირაკლი ფიფიას ურთიერთგამომრიცხავი ვერსიები აქვთ.

საქმე ეხება მოწმის, მიხეილ კალანდიას ზუსტ ადგილმდებარეობას, მაშინ როდესაც ბრალდების ვერსიით, გ.ბ. დანას ურტყამდა დათო სარალიძეს.

კომისიაში გაცხადებული პროკურორ ზვიად ფხაკაძის ჩვენებით, მიხეილ კალანდია 8-9 მეტროს მოშორებით იყო, როდესაც გ.ბ. სარალიძეს დანას ურტყამდა. შსს-ს გაჟღერებული ვერსიით კი, კალანდია მაშინვე შეყვა ფარდულში მოჩხუბარ სარალიძესა და გ.ჯ.-ს.

შსს-ს გამომძიებლის ჩვენება კომისიაში

"ჩვენებებით ირკვევა, რომ [მსჯავრდებული] გ.ჯ.და დათო სარალიძე უხეშად გაიწივნენ ერთმანეთის მიმართულებით. დათო სარალიძე ეჯახება გ.ჯ.-ს, რაგბის ილეთის მაგვარი მოძრაობით. შედეგად, გ.ჯ. და დათო სარალიძე აღმოჩნდნენ ფარდულში. ამ დროს, გ.ჯ. არის ზურგით ფარდულისკენ და დათო სარალიძე პირით მისკენ. მათთან ერთად ფარდულში აღმოჩნდნენ დ.ღ. და მ.კ".

თავმჯდომარე განმარტავს, რომ დ.ღ. [სარალიძის მეგობარი] და მ.კ. [გ.ჯ.-ს მხარე] მყისიერად, დატაკებისთანავე შეყვნენ მოჩხუბრებს ფარდულში, რაზეც გამომძიებელი მას დაეთანხმა.

"ჩვენებებით, ამავე ფარდულში ფიქსირდებიან [მსჯავრდებული] გ.ბ. და გ.მ. ისინი ჩხუბის დაწყების დროს, უშუალოდ, საუბრის დაწყებისას დგანან ოდნავ უკან, რამდენიმე მეტრის მოშორებით".

როგორც გამომძიებელი მიუთითებს, ისინი [გ.ბ. და გ.მ.] დგანან არკასთან, შესასვლელის მხარეს. კომისიის წევრი, სერგი კაპანაძე გამომძიებელს განუმარტავს, არის თუ არა ეს დაახლოებით 8-9 მეტრი ფარდულიდან. ამაზე გამომძიებელი პასუხობს, რომ ჩხუბი როცა იწყება, მას წინ უძღვის გინება, ფიზიკური დაპირისპირება, ხოლო მოშორებით მდგარი პირები მიდიან მოჩხუბრებთან ცენტრში.

"ამ დროს ფარდულში ჩხუბობენ გ.ჯ. და დათო სარალიძე. ფარდულში შედის გ.ბ., რომელიც ჭრილობებს აყენებს დათო სარალიძეს. ასევე რამდენიმე ჭრილობას აყენებს გ.ჯ. ამავე ფარდულში დ.ღ და გ.მ. ფიქსირდებიან. მ.კ. ამბობს ჩვენებისას, რომ ის ცდილობს თავისი მეგობრის, გ.ჯ.-ს დახმარებას, ვინაიდან დათო სარალიძე ფიზიკურად ძლიერია და სურს მოარიდოს ინციდენტს, ურტყამს ხელს დათო სარალიძეს".

პროკურორ ზვიად ფხაკაძის ჩვენება

"როდესაც ფარდულში სარალიძემ შებოჭა გ.ჯ., მასთან პირველი მიდის გ.ბ., რომელიც დანის გამოყენებით ჭრილობებს აყენებს [დათო სარალიძეს]. ამ მომენტს მ.კ. ხედავს დაახლოებით ფარდულიდან 8-9 მეტრიდან და მიემართება ფარდულის მიმართულებით. როდესაც მიდის ფარდულთან ამ დროს გ.ბ. მიემართება მარცხნივ".

სერგი კაპანაძემ დღევანდელ სხდომაზე გამომძიებლებს, შალვა ბედოიძესა და ირაკლი ფიფიას ჰკითხა, იყო თუ არა სიმართლე პროკურორის ინფორმაცია, რაზეც თავდაპირველად ბედოიძისაგან მიიღო პასუხი, რომ მცირე ეპიზოდით არ ჩანდა, თუ რის საფუძველზე ამბობდა პროკურორი აღნიშნულს.

პროკურორი ირაკლი ფიფია განმარტავს, რომ სავარაუდოდ, პროკურორი პროცესზე გამოკვლეული ჩვენებიდან ჰყვება, რასაც თავად არ ესწრებოდა. მანვე დაადასტურა რომ მათ არ გააჩნიათ არცერთი ჩვენება, რითიც დასტურდება, რომ მიხეილ კალანდია 8-9 მეტრის მოშორებით უყურებდა ჩხუბს.

შალვა ბედოიძისა და სერგი კაპანაძის დიალოგს უცვლელად გთავაზობთ:

სერგი კაპანაძე: თქვენს ხელთ არსებული ჩვენებებით, რაც გამოძიების ეტაპზე გქონდათ, განცხადება, რომ [მსჯავრდებული] გ.ბ. როდესაც აყენებდა ჭრილობებს დათო სარალიძეს, ამას მ.კ. უყურებდა 8-9 მეტრის მოშორებით, არის თუ არა სიმართლე?

შალვა ბედოიძე: ჩვენს ხელთ არსებული მონაცემებით, ვეთანხმები სრულად, რაც გამომძიებელმა მოგახსენათ.

სერგი კაპანაძე: დაივიწყეთ პროკურორმა რაც თქვა, სერგი კაპანაძე გეუბნებათ, რომ როდესაც გ.ბ. აყენებდა ჭრილობას დათო სარალიძეს ფარდულში, ამას მ.კ. უყურებდა 8-9 მეტრიდან, ჩემი განცხადება არის თუ არა სიმართლე, იმ მასალებიდან გამომდინარე, რაც გქონდათ მოპოვებული.

შალვა ბედოიძე: თქვენი განცხადება რა თქმა უნდა, არ შეეფერება სიმართლეს.