ხვალ რომ საპარლამენტო არჩევნები ტარდებოდეს, გადაწყვეტილი ამომრჩევლის 47 პროცენტის მოსაზრებით, არჩევნებში გაიმარჯვებდა ქართული ოცნება, იმავეს ფიქრობს გადაუწყვეტელი ამომრჩევლის 31 პროცენტი. აღნიშნული შედეგი მიიღო NDI-მ მოქალაქეთა გამოკითხვის შედეგად.

იგივე კვლევის მიხედვით, გადაწყვეტილი ამომრჩევლის 19 პროცენტს სჯერა, რომ გაიმარჯვებდა ნაციონალური მოძრაობა, ამავე აზრზეა გადაუწყვეტელი ამომრჩევლის მხოლოდ 6 პროცენტი.

რაც შეეხება გადაუწყვეტელი ამომრჩევლის 49 პროცენტს, მათ არ იციან, ვინ შეიძლებოდა ყოფილიყო არჩევნების გამარჯვებული, თუ ეს არჩევნები ხვალ ჩატარდებოდა. მსგავსი განწყობა აქვს გადაწყვეტილი ამომრჩევლის 21 პროცენტს.

გადაწყვეტილი ამომრჩევლის 4 და გადაუწყვეტელის 3 პროცენტის მოსაზრებით, მოსალოდნელ არჩევნებში გამარჯვებას მოიპოვებდა პაატა ბურჭულაძის სახელმწიფო ხალხისთვის.

NDI-ის შეფასებით, 2016 წლის საპარლამენტო არჩევნების პროგნოზირება რთულია, რადგან მოქალაქეთა უმრავლესობას არჩევნებში მონაწილეობა გადაწყვეტილი აქვს, თუმცა ჯერ არ იციან, ვის მისცემენ ხმას. გარდა ამისა, ყველა პარტიას რეიტინგის დაბალი მაჩვენებელი აქვს. გარდა ამისა, არჩევნების შედეგი ამ გამოკითხვისგან განსხვავებული იქნება, რადგან არჩევნების ბედს გადაუწყვეტელი ამომრჩეველი გადაწყვეტს.

NDI-ის კვლევის საველე სამუშაოები CRRC- საქართველომ ჩაატარა 2016 წლის 8 ივნისიდან 6 ივლისის პერიოდში. სულ მომზადდა 4 113 დასრულებული ინტერვიუ. განხორციელდა წარმომადგენლობითი შერჩევა ქვეყნის მასშტაბით, ამასთან, დამატებითი წარმომადგენლობითი შერჩევა თბილისში, ქალაქისა და სოფლის ტიპის დასახლებებში, ეროვნული უმცირესობებით მჭიდროდ დასახლებულ რეგიონებში. კვლევის საშუალო ცდომილების ზღვარი არის +/- 2,1%.