Fox News-ის ინფორმაციით, აშშ-ის პრეზიდენტის, დონალდ ტრამპისა და რუსეთის პრეზიდენტის, ვლადიმერ პუტინის პირველი სამიტი ფინეთის დედაქალაქ ჰელსინკიში გაიმართება.

მანამდე, დონალდ ტრამპმა ვარაუდის დონეზე თქვა, რომ მათი შეხვედრა ჰელსინკიში ნატოს სამიტის შემდეგ გაიმართებოდა. სამიტი 11-12 ივლისს ბრიუსელში უნდა ჩატარდეს. ეს იქნება მაღალ დონეზე ლიდერების პირველი შეხვედრა მას შემდეგ, რაც 2017 წელს "დიდი ოცეულის" სამიტის ფარგლებში დონალდ ტრამპი და ვლადიმერ პუტინი ერთმანეთს პირველად შეხვდნენ.

სამომავლო შეხვედრის დეტალებზე პუტინმა ტრამპის მრჩეველთან, ჯონ ბოლტონთან 27 ივნისს ისაუბრა. რუსეთის პრეზიდენტის მრჩევლის, იური უშაკოვის თქმით, ბოლტონმა და პუტინმა აშშ-ის საპრეზიდენტო არჩევნებში რუსეთის სავარაუდო ჩარევა განიხილეს. უშაკოვის განმარტებით, საკითხი რუსულმა მხარემ წამოწია.

რუსეთის პრეზიდენტის მრჩევლის განმარტებით, პუტინმა კიდევ ერთხელ დააფიქსირა, რომ 2016 წლის საპრეზიდენტო არჩევნებში რუსეთი არ ჩარეულა.

პრესკონფერენციაზე ჯონ ბოლტონმა განაცხადა, რომ არჩევნებში ჩარევა შესაძლოა, პრეზიდენტებმა სამიტზეც განიხილონ. ასევე, ბოლტონის თქმით, შეხვედრა მნიშვნელოვანი საკითხებისადმი აშშ-ის პოზიციაზე გავლენას არ იქონიებს. კერძოდ, აშშ ყირიმს რუსეთის ნაწილად არ აღიარებს და არც სანქციებს მოიხსნის.