მას შემდგე, რაც საქართველოს ახალგაზრდა იურისტთა ასოციაციამ ოჯახში ძალადობის მსხვერპლ ქალის მიმართ ბრალის წაყენებაზე ინფორმაცია გაავრცელა, პროკურატურამ განცხადებით უპასუხა. პროკურატურაში ირწმუნებიან, რომ ქალმა ყოფილი ქმარი ცრუდ ამხილა.

უწყების განმარტებით, ამ წლის 2 თებერვალს თ.ბ. [თამარ ბეკარაშვილი] დედასთან ერთად შვილის წამოსაყვანად ყოფილი ქმრის სახლში მივიდა. იმის გამო, რომ ბავშვს წასვლა არ უნდოდა და ტიროდა ყოფილ ცოლ-ქმარს შელაპარაკება მოუვიდა.

როგორც უწყება განმარტავს, კონფლიქტის თავიდან არიდებისათვის ყოფილი ქმარი სახლში შევიდა. მომხდარზე განაწყენებულმა ქალმა შურისძიების მიზნით პოლიციაში დარეკა და ყოფილი ქმარი ცრუდ დაასმინა. პროკურატურის განცხადებით, ადგილზე მისულ პოლიციას ქალმა ყოფილ ქმარზე მიუთითა და ის ადგილზე დააკავეს.

პროკურატურის განცხადებაში ნათქვამია, რომ მტკიცებულებებით, მათ შორის, შემთხვევის ამსახველი ვიდეო ჩანაწერებით, ყოფილი ქმრის ბრალეულობა არ დადასტურდა.

სისხლის სამართლის საქმეზე გრძელდება გამოძიება. ბრალდებულისთვის წარდგენილი ბრალდება სასჯელის სახედ და ზომად ჯარიმას, საზოგადოებისთვის სასარგებლო შრომას ან ოთხ წლამდე თავისუფლების აღკვეთას ითვალისწინებს.

თამარ ბეკარაშვილის საქმესთან დაკავშირებით საქართველოს ახალგაზრდა იურისტთა ასოციაციამ განცხადება გაავრცელა. საია-ს პოზიციით, პროკურატურა ქალისთვის ბრალის წარდგენისას დაეყრდნო მიკერძოებულ მოწმეებს.

"პროკურატურამ არ გაითვალისწინა სხვა მტკიცებულებები, რომლითაც დგინდებოდა, რომ თამარ ბეკარაშვილი არის ძალადობის მსხვერპლი, მათ შორის, არ გაითვალისწინა თბილისის საქალაქო და სააპელაციო სასამართლოების გადაწყვეტილებები, რომლებითაც ამავე ფაქტზე თამარ ბეკარაშვილი ცნობილია ოჯახში ძალადობის მსხვერპლად", - ნათქვამია საია-ს განცხადებაში.

საია მიიჩნევს, რომ ოჯახში ძალადობის მსხვერპლი ქალის მიმართ პროკურატურის მიერ ბრალის წარდგენა არის დაუსაბუთებელი, კანონთან შეუსაბამო და იწვევს მსხვერპლის ხელახალ ვიქტიმიზაციას.