პროკურატურამ ბრალი წაუყენა ოჯახში ძალადობის მსხვერპლ ქალს, რომელმაც პოლიციას ყოფილი ქმრის მიერ განხორციელებული ძალადობისაგან დაცვის მიზნით მიმართა. ამის შესახებ ინფორმაცია ახალგაზრდა იურისტთა ასოციაციამ გაავრცელა.

საია-ს ცნობით, 2018 წლის თებერვალში თამარ ბეკარაშვილმა მიმართა პოლიციას და აცნობა, რომ ყოფილმა ქმარმა მასზე და მის დედაზე ფიზიკურად იძალადა. გამოძიების საწყის ეტაპზე თამარ ბეკარაშვილის ყოფილი ქმარი დააკავეს და მის მიმართ სისხლის სამართლებრივი დევნა დაიწყო. 2018 წლის ივნისს, პროკურატურამ ძალადობაში მხილებული პირი დაზარალებულად ცნო და მსხვერპლს წაუყენა ბრალი ყოფილ ქმარზე ძალადობისა და მისი ცრუ დასმენის საფუძვლით.

საია-ს პოზიციით, პროკურატურა მსხვერპლი ქალისთვის ბრალის წარდგენისას დაეყრდნო მიკერძოებულ მოწმეებს.

"პროკურატურამ არ გაითვალისწინა სხვა მტკიცებულებები, რომლითაც დგინდებოდა, რომ თამარ ბეკარაშვილი არის ძალადობის მსხვერპლი, მათ შორის, არ გაითვალისწინა თბილისის საქალაქო და სააპელაციო სასამართლოების გადაწყვეტილებები, რომლებითაც ამავე ფაქტზე თამარ ბეკარაშვილი ცნობილია ოჯახში ძალადობის მსხვერპლად", - ნათქვამია საია-ს განცხადებაში.

საია მიიჩნევს, რომ ოჯახში ძალადობის მსხვერპლი ქალის მიმართ პროკურატურის მიერ ბრალის წარდგენა არის დაუსაბუთებელი, კანონთან შეუსაბამო და იწვევს მსხვერპლის ხელახალ ვიქტიმიზაციას.

"ნაცვლად იმისა, რომ სახელმწიფოს ძალადობის მსხვერპლი ქალისთვის შეეთავაზებინა დაცვის ეფექტური მექანიზმები, რეპრესიული ღონისძიებები გამოიყენა რეალური მსხვერპლის მიმართ", - აცხადებენ საია-ში.

მათი პოზიციით, აღნიშნული მიდგომა არსებითად ლახავს არა მხოლოდ თამარ ბეკარაშვილის ინტერესებს, არამედ მსგავსი პრაქტიკა უარყოფითად აისახება ოჯახში ძალადობის წინააღმდეგ ბრძოლაზე და მსხვერპლ ქალებს გაუღრმავებს დაუცველობის განცდას. თამარ ბეკარაშვილის ინტერესებს სისხლის სამართლის საქმეზე საია იცავს.

On.ge საქმის დეტალებს საქართველოს პროკურატურაში არკვევს და განახლებულ ინფორმაციას პროკურატურიდან ამავე ნიუსში მოგაწვდით.