თბილისის ისტორიულ უბნებში იმ გათბობისა და გაგრილების სისტემების დემონტაჟი განხორციელდება, რომლებმაც შენობების გარე ფასადი დააზიანა. ეს გადაწყვეტილება თბილისის მერმა კახა კალაძემ მიიღო და ზედამხედველობის სამსახურს დაავალა, რეაბილიტირებულ ადგილებში მსგავსი ფაქტები დააფიქსიროს და აღწეროს.

ზედამხედველობის სამსახურმა დავალება ოფიციალურად რამდენიმე საათია მიიღო და დეტალები, თუ რომელი ქუჩების რეაბილიტირება მოხდება, სად განხორციელდება დემონტაჟი და რამდენი დაუჯდება მერიას უკვე რეაბილიტირებული ფასადების თავიდან რეაბილიტირება, ჯერჯერობით უცნობია.

On.ge-ს თბილისის მერიის პრესსამსახურში განუცხადეს, რომ დეტალები მას შემდეგ დაზუსტდება, რაც ზედამხედველობის სამსახური პრობლემის გამოკვლევასა და აღწერას დაასრულებს.

ამჯერად კი ცნობილია, რომ:

  • დაზიანებული ფასადების რეაბილიტაცია, კონდიციონერებისა და გამათბობლების დემონტაჟი მხოლოდ თბილისის ისტორიულ უბნებში განხორციელდება;
  • რეაბილიტაცია მხოლოდ შენობის გარე ფასადებს შეეხება;
  • მერია თანხებს მხოლოდ ფასადების რეაბილიტაციისთვის გამოყოფს, კონდიციონერებისა და გამათბობლების დემონტაჟის ხარჯები კი მოსახლეობამ უნდა გაწიოს;
  • მერიაში განმარტეს, რომ კონდიციონერები და გამათბობლებისთვის ალტერნატივად ის ადგილი მოიძებნება, რომელიც გარე ფასადებს არ დააზიანებს;
  • მოსახლეობას მოუწევს გამგეობასთან შეათანხმოს, სად განათავსებს აღნიშნულ სისტემებს.

ზედამხედველობის სამსახურს სამოქმედოდ გარკვეული დრო მიეცა. ამ დროის გასვლის შემდეგ გაირკვევა, რომელ ქუჩებს, რამდენ სახლს შეეხება დემონტაჟი-რეაბილიტაცია და რა დაუჯდება მერიას გარე ფასადებზე ზრუნვა.