თბილისის მერის, კახა კალაძის განცხადებით, კონდიცირებისა და გათბობის სისტემებით ქალაქის რეაბილიტირებულ ადგილებში ფასადებია დაზიანებული. მისი თქმით, მოსახლეობამ გონივრულ ვადაში საყოფაცხოვრებო ინფრასტრუქტურა უნდა მოხსნას, ხოლო დაზიანებულ ფასადს მერია თავისი ხარჯებით აღადგენს.

"მესმის, რომ საყოფაცხოვრებო პირობებისთვის სხვადასხვა ინფრასტრუქტურის მოწყობა აუცილებელია, მაგრამ ეს ფასადების დაზიანების ხარჯზე არ უნდა მოხდეს. ეს კატეგორიულად მიუღებელია", - განაცხადა მერმა.

კალაძემ თბილისის ზედამხედველობის სამსახურს დაავალა, რომ რეაბილიტირებულ ადგილებში მსგავსი ფაქტები დააფიქსიროს და აღწეროს.

მერის განმარტებით, ძველი თბილისის სარეაბილიტაციო სამუშაოები გაგრძელდება. ამ ეტაპზე გუდიაშვილისა და ორბელიანის მოედნების პროექტისთვის 110 მილიონი ლარი იხარჯება, ხოლო მომდევნო წლებში ქალაქის რეაბილიტაციისთვის ნახევარი მილიარდი ლარის დახარჯვა იგეგმება.