საქართველოს საპატრიარქო 21 ივნისის სინოდის სხდომის ოქმს აქვეყნებს, სადაც ნათქვამია, თუ რაზე ისაუბრეს სასულიერო პირებმა.

ოქმის თანახმად, სხდომის თავმჯდომარე იყო მართლმადიდებლური ეკლესიის კათოლიკოს პატრიარქი ილია მეორე, სხდომის მდივანი აბბა ალავერდელი მიტროპოლიტი დავითი, სხდომას ესწრებოდა 43 მღვდელმთავარი და არ ესწრებოდა 4.

სინოდის კრებამ დაადგინა:

• მოსაყდრის ამჟამად არსებული სტატუსის განსაზღვრება შემდეგი სახით: საპატრიარქო ტახტის მოსაყდრე;
• საქართველოს კათოლიკოს-პატრიარქმა სენაკისა და ჩხოროწყუს მიტროპოლიტი საპატრიარქო ტახტის მოსაყდრე შიო დააჯილდოვა სკუფიაზე ბრილიანტის ჯვრის ტარების უფლებით.

სინოდი დემოგრაფიაზე

სხდომის ოქმის მიხედვით, სინოდი მიიჩნევს, რომ საქართველო დემოგრაფიული თვალსაზრისით მძიმე გამოწვევების წინაშე დგას და ქვეყანას მართებს მკვეთრი ნაბიჯების გადადგმა.

სინოდი სახელმწიფოს მოუწოდებს ისეთი პროგრამების დროულად განხორციელებისკენ, რაც ხელს შეუწყობს მრავალშვილიანობის წახალისებასა და მხარდაჭერას.

საპატრიარქო აბორტის საწინააღმდეგო პროპაგანდაზეც საუბრობს და ითხოვს, გატარდეს განსაკუთრებული რეგულაციები ორსულ ქალთა როგორც სოციალური მხარდაჭერის, ასევე ჯანმრთელობის ხელშეწყობისთვის.

სინოდი მიიჩნევს, რომ გამორჩეული ყურადღება დაეთმოს ხუთ წლამდე ბავშვთა სამედიცინო მომსახურეობის ხარისხის გაუმჯობესებას.

სინოდი ნარკოპოლიტიკაზე

საპატრიარქო იშველიებს საკონსტიტუციო სასამართლოში სარჩელის განხილვის საქმეს, მარიხუანის 70 გრამამდე ფლობის შემთხვევაში ადმინისტრაციული სასჯელის გაუქმების შესახებ. აღნიშნული საპატრიაქროს მიუღებელად მიაჩნია.

საპატრიარქოს მიაჩნია, რომ საკონსტიტუციო სასამართლოს მიერ ნარკოლიბერალიზაციასთან დაკავშირებით უკვე მიღებული გადაწყვეტილება დიდი საფრთხის შემცველია:

"ნარკოპოლიტიკის ლიბერალიზაციის პროცესი განუხრელად უნდა იყოს დაკავშირებული ნარკოტიკებით მოვაჭრეთა და გამავრცელებელთა მიმართ უმკაცრესი სამართლებრივი ზომების გატარებასთან".

ოქმში ნათქვამია ისიც, რომ სხდომისას წამოიჭრა საკითხი ნარკოტიკული ნივთიერებების ზემოქმედების დროს გარდაცვლილი ადამიანების ეკლესიური წესის აღსრულების შესახებ. კრებამ დაადგინა, რომ ამაზე უნდა შეიქმნას კომისია საკითხების საეკლესიო ერთიანი პოზიციის შესამუშავებლად.

ბავშვთა ღრმა-ფილოსოფიური აზროვნების განვითარებაზე

როგორც ოქმში ვკითხულობთ, კათოლიკოს-პატრიარქმა სასწავლებლებში ბავშვთა ადრეულ ასაკში ღრმა-ფილოსოფიური აზროვნების განსავითარებლად და ლოგიკური მოქმედებების უნარ-ჩვევების სწავლების შესაძენად სათანადო სწავლების აუცილებლობაზე ისაუბრა.

უკრაინის ეკლესია

ოქმის თანახმად, კათოლიკოს-პატრიარქმა ისაუბრა უკრაინაში შექმნილ საეკლესიო რთულ ვითარებაზე. მან სიტყვა მისცა საპატრიარქოს საგარეო საქმეთა განყოფილების თავმჯდომარეს, ზუგდიდისა და ცაიშის მიტროპოლიტ გერასიმეს, რომელმაც აღნიშნა, რომ საპატრიარქოში შესულია 3 წერილი, კონსტანტინეპოლის მთავარეპისკოპოსისა და მსოფლიო პატრიარქის სამდივნოდან, მოსკოვისა და სრულიად რუსეთის საპატრიარქოდან და უკრაინის მართლმადიდებელი ეკლესია - მოსკოვის საპატრიარქოდან.

ოქმის თანახმად, სხდომაზე წაიკითხეს წერილები და სინოდის წევრები გაეცნენ შექმნილ ვითარებას უკრაინაში საეკლესიო მდგომარეობის შესახებ.