საქართველოს პრემიერ-მინისტრობის კანდიდატმა მამუკა ბახტაძემ 2018-2020 წლის სამთავრობო პროგრამა, "თავისუფლება, სწრაფი განვითარება, კეთილდღეობა" წარადგინა.

52-გვერდიანი პროგრამის მიხედვით, რომელიც საქართველოს პარლამენტის ვებგვერდზე გამოქვეყნდა, მთავრობის მიერ გადადგმულმა ნაბიჯებმა გრძელვადიან პერიოდში ქვეყნის სოციალური და ეკონომიკური განვითარების მყარი საფუძველი უნდა შექმნას.

მამუკა ბახტაძის სამთავრობო ხედვა ხუთ ძირითად პრინციპს ემყარება:

• ქართველი ხალხის ისტორიული არჩევანის სრული განხორციელება და საქართველოს ევროპულ და ევროატლანტიკურ სივრცეში შეუქცევადი ინტეგრაცია, ევროპულ და ევროატლანტიკურ სტანდარტებთან ჰარმონიზაცია მნიშვნელოვანია ყველა სექტორში. მათ შორის ეკონომიკური პოლიტიკა და საერთაშორისო ვაჭრობა, განათლების სისტემის რეფორმა. ქვეყნის ინსტიტუციონალური განვითარება და თავდაცვისუნარიანობის ამაღლება. ამ მიმართულებით ქართულ ოცნებას აქვს უდიდესი წარმატებები და ამ წარმატებას უფრო მეტად განმტკიცება და გაღრმავება სჭირდება.
• მთავრობა ყველა მიმართულებით გაატარებს ძირეულ ცვლილებებს და ინოვაციურ რეფორმებს. ამ რეფორმების შედეგად, მივიღებთ ეკონომიკის ისეთ მოდელს, დავამკვიდრებთ ისეთ სამართლიან თამაშის წესებს, რომლებიც აისახება თითოეულ ოთახზე, თითოეულ საქართველოს მოქალაქეზე. ამის შედეგად, დაიძლევა სიღარიბე და ეკონომიკური მდგომარეობის ჩამორჩენა დემოკრატიის მაღალ სტანდარტთან შედარებით. ამავე დროს, გაგრძელდება დემოკრატიული ინსტიტუტების შემდგომი განვითარება და გაძლიერება.
• მცირე მთავრობის კონცეფცია. ქვეყანას სჭირდება მცირე, მოქნილი და ეფექტური ბიუროკრატია - სამთავრობო ინსტიტუტები, რომლებიც მოქმედებენ გამჭვირვალობის მაღალი სტანდარტით და რომლებზეც ხორციელდება საზოგადოებრივი და ინსტიტუციონალური კონტროლი, მათ შორის ანტიკორუფციული კუთხით.
• განათლება, ახალგაზრდობა და ინოვაცია. განათლებული, მოტივირებული, სამეწარმეო სულისკვეთების მქონე, საკუთარ შესაძლებლობებში დარწმუნებული ახალგაზრდობა გახდება იმ მთავარი შედეგის მომტანი, რომელიც საქართველოს ჩააყენებს განვითარებული და ინოვაციური ეკონომიკის მქონე ქვეყანათა შორის. შესაბამისად, განათლებაში ფუნდამენტურ რეფორმას და მასშტაბურ ინვესტიციებს მიენიჭება უმთავრესი პრიორიტეტი.
• ადამიანი და მასზე ზრუნვა იყო, არის და იქნება ჩვენი მთავარი ღირებულება. ამიტომ ყველა ძალისხმევა თუ ინიციატივა ორიენტირებული იქნება თითოეულ ადამიანზე, მისი თავისუფლებისა და ღირსების დაცვაზე, მისთვის საკუთარ ქვეყანაში კეთილდღეობისა და თვითრეალიზაციის ფართო შესაძლებლობების მიცემაზე.

"აღნიშნულ პრინციპებზე დაყრდნობით განხორციელებული რეფორმების შედეგად, საქართველო გახდება უალტერნატივო ჩვენი აფხაზი და ოსი ძმების დასაბრუნებლად", - ნათქვამია სამთავრობო პროგრამაში.

დროებითი მთავრობის მიერ მომზადებული სამთავრობო პროგრამა რამდენიმე ძირითად მიმართულებას მოიცავს:

1. საგარეო პოლიტიკა, უსაფრთხოება და თავდაცვა;
2. ძირეული და ინოვაციური რეფორმები;
3. მცირე მთავრობა;
4. განათლება და ახალგაზრდობა;
5. ადამიანი და მასზე ზრუნვა;
6. ჯანმრთელობის დაცვა და სოციალური მდგომარეობა.

ძველი მთავრობის შემადგენლობას გაერთიანებულ კომიტეტებზე 19 ივნისს მთელი დღის მანძილზე მოუსმენენ. ძველი მთავრობისა და ახალი პრემიერის დამტკიცების შემდეგ, პარლამენტი სტრუქტურულ ცვლილებებს განახორციელებს, რაც იმას ნიშნავს, რომ სამინისტროების რაოდენობა 14-დან 11-მდე შემცირდება და უკვე სამი კვირის შემდეგ, მამუკა ბახტაძე განახლებულ მთავრობას წარადგენს.