მთავრობაში სტრუქტურული ცვლილებებია - სამინისტროების ნაწილი გაერთიანდება. ცვლილებების შედეგად სამინისტროების რაოდენობა შემცირდება და 14-ს ნაცვლად 11იქნება. ამის შესახებ პრემიერ-მინისტრობის კანდიდატმა, მამუკა ბახტაძემ უმრავლესობის წევრებთან შეხვედრის შემდეგ განაცხადა.

ბახტაძეს არ დაუკონკრეტებია რომელ სამინისტროებზეა საუბარი. მისი თქმით, პარლამენტის წინაშე წარსდგება ძველი შემადგენლობით და მოგვიანებით შეიცვლება როგორც სამინისტროების რაოდენობა, ასევე მინსიტრთა კაბინეტიც.

"ეს რეფორმა, რომელიც სამთავრობო პროგრამის ნაწილია და დაუყოვნებლივ უნდა განხორციელდეს, საჭიროებს სამთავრობო ცვლილებებს, რაც შესაბამის დროს და პროცედურებს მოითხოვს. ჩვენთვის ნდობის გამოცხადება კანონით დადგენილ ვადებში, სამწუხაროდ, ვერ ესწრება."

პრიორიტეტად პრემიერ-მინისტრობის კანდიდატმა მცირე ზომის, მაგრამ ოპერატიული და მოქნილი მთავრობა დაასახელა.

ქართული ოცნების მმართველობის პერიოდში მესამე პრემიერ-მინისტრმა გიორგი კვირიკაშვილმა 13 ივნისს პრემიერ-მინისტრის თანამდებობა დატოვა და ამის მიზეზად გუნდში არსებული აზრთა სხვადასხვაობა დაასახელა. საქართველოს კონსტიტუციის თანახმად, პრემიერის გადადგომასთან ერთად, მთავრობის შემადგენლობაც გადამდგარად ითვლება.