დღეს გავრცელებული ინფორმაციით, შს მინისტრმა, ვახტანგ გომელაურმა, რომელიც პოსტს თითქმის 6 წლის განმავლობაში იკავებდა, თანამდებობა დატოვა. აშშ-სა და ბრიტანეთის მიერ სანქცირებულმა გომელაურმა, რომელსაც ლომის წვლილი მიუძღვის "ოცნების" მთავრობის მიერ პოლიციური რეჟიმის ჩამოყალიბების, საპროტესტო აქციების კანონდარღვევებით დარბევასა და სამოქალაქო საზოგადოებაში რეპრესიების დაწყებაში, გადადგომის მიზეზად ოჯახთან მეტი დროის გატარების სურვილი დაასახელა.

წარმოგიდგენთ 5 მიზეზს, რის გამოც გომელაური შსს-ს სადავეებთან არავის მოგვენატრება:

1. აქციების ძალადობრივად დარბევის ბრძანებების გაცემა

მართალია, ვახტანგ გომელაურს საკუთარ ოჯახთან სურს დროის გატარება, თუმცა სხვისი ოჯახის წევრების სასტიკად დარბევის ბრძანებებს თავად გასცემდა მისი მინისტრობის პერიოდში გამართულ საპროტესტო აქციებზე. "ბრძანებებს მე გავცემ, პირადად გეუბნებით. მარტო გაზზე არა, ბრძანებას ყველაფერზე მე გავცემ, წყლის ჭავლის გამოყენებაზეც," — უთხრა მინისტრმა ჟურნალისტებს 2024 წლის ოქტომბრის აქციების დარბევების შესახებ.

2. პასუხისმგებლობის არიდების მუდმივი მცდელობები

მაშინ, როცა უწყვეტ საპროტესტო აქციებზე ჟურნალისტებზე ძალადობა და მათი დაკავება დაიწყეს, შს მინისტრი კომენტარს აკეთებს მთავარი არხის ოპერატორის, სერგი ბარამიძის დაკავებაზე — "ვერ გეტყვით, ის სწორად დააკავეს თუ არასწორად" — ამბობდა თანამდებობის პირი, რომლის პირდაპირი მოვალეობაც კანონის აღსრულება იყო.

გაუგებარი, ორაზროვანი განცხადებები ალბათ ის მთავარი რამაა, რაც გომელაურისგან ყველაზე მეტად არ მოგვენატრება. უამრავი რამ იყო იმ საკითხების ჩამონათვალში, რაზე საუბარიც შს მინისტრს დაზუსტებით არ შეეძლო: "შეიძლება რაღაც პროცენტით მოიმატა პანდემიის პერიოდში ოჯახში ძალადობის თემამ, თუმცა ვერ გეტყვით პანდემიის გულიზა მოიმატა, თუ რისი გულიზა მოიმატა, ნამდვილად ვერ გეტყვით" — ამბობდა მინისტრი 2021 წელს ოჯახური ძალადობის მატების შესახებ.

3. დამნაშავეების დაწინაურება

გომელაური, რომელიც სამსახურებრივი გულგრილობის, მაგნისტკის სიაში შეყვანისა და სხვა საერთაშორისო სანქციების ფონზე ირაკლი კობახიძემ ღირსების ორდენით დააჯილდოვა, თავადაც ახალისებდა იმ ადამიანებს, რომლებიც მორალური წნეხისა თუ კანონების მიუხედავად, საფუძველს უქმნიდა პოლიციური რეჟიმის ჩამოყალიბებას. მაგალითად, გომელაურმა თავის პირველ მოადგილედ დანიშნა როლანდ მესხი, პოლიციელი, რომელიც საზოგადოებამ სტუდენტი გოგოს თმით მოქაჩვით დაიმახსოვრა.

4. მოძალადე ჯგუფებთან მშვიდობიანი მოქალაქეების შეტოვება

2021 წლის 5 ივლისს, როცა თბილისში დაანონსებული პრაიდის ფესტივალის პარალელურად ჰომოფობიურ და ძალადობრივ კონტრაქციებზე მედიის 50-ზე მეტი წარმომადგენელი დაშავდა და გარდაიცვალა ტვ პირველის ოპერატორი ლექსო ლაშქარავა, გომელაური ინციდენტზე მედიასთან ორაზროვან კომენტარებს აკეთებდა. "იქ მყოფი პოლიციის ფუნქცია ნაცემი ადამიანების გამოყვანა და არა მოძალადეების დაკავება იყო" — ამბობდა მინისტრი მაშინ, როცა თბილისი პრაიდის საორგანიზაციო ჯგუფს პრაიდის ჩატარებამდე შსს-სგან უსაფრთხოების გარანტია ჰქონდა მიღებული.

5. მისი საუბრის მანერა

გომელაურს ერთ რამეს ვერ დავუკარგავთ — ავთენტურობა და მისთვის ბუნებრივად დამახასიათებელი საუბრის სტილი მინისტრმა ნამდვილად შეინარჩუნა. გომელაურისგან კუთხური დიალექტისა და ქუჩური ტერმინების სმენა გვიწევდა, რაც ნამდვილად არ მოგვენატრება: "მინდა ბათუმში წავალ, მინდა სამცხეში, მინდა კახეთში. მე ვარ შინაგან საქმეთა მინისტრი, თქვენ არ გაბარებთ აჩოტებს მე სად ვივლი, უკაცრავად" — თქვა მინისტრმა 2020 წელს.