"აი, ეს არასამთავრობო, არა მხოლოდ რუსეთს და კადიროვის ჩეჩნეთს "იცავს" ჩემგან, არამედ ამ "დაცვაში" ნათლად გამოსჭვივის ქართველი ერის, როგორც მრავალეთნიკური ერთობის მიმართ, დისკრიმინაციული მიდგომა", - ასე პასუხობს სააკაშვილი არაფობიას! კრიტიკას მის მიერ, სექსისტური და დისკრიმინაციული განცხადებების გავრცელებასთან დაკავშირებით.

სააკაშვილი არ ეხმაურება მეზვრიშვილის სექსისტურად მოხსნიებას და მხოლოდ ქსენოფობიურ კომენტარებზე საუბრობს. მისი თქმით, არაფობიას! განცხადებას არაფერი აქვს საერთო რეალობასთან, ის აგებულია სიცრუეზე და ყველაფრის უკუღმა წარმოდგენაზე.

"ტექსტის შემდგენელებისგან შეგნებულადაა ამოღებული კადიროვი და ამით ცდილობენ ჩემს მიერ ნათქვამი აზრის დამახინჯებას. ხაზგასმით ვიმეორებ-კადიროვის ჩეჩნეთი არის ისეთივე საშიში, როგორც პუტინის კაცთმოძულე მმართველობა.
ის, რომ რუსეთიდან ჩამოყვანილი აფერისტი შალელაშვილი საქართველოს პარლამენტში არ უნდა იჯდეს და ჩვენ ქვეყანას არ უნდა ძარცვავდეს, და რომ ის თავისი ეთნიკური წარმომავლობის ხაზგასმით, ვერ მოიპოვებს უფლებას, დაკავდეს საეჭვო საქმიანობით, სრულიად ნათელია ყველასთვის, ვისაც ობიექტურობის ნატამალი გააჩნია", - წერს სააკაშვილი ფეისუბქგვერდზე.

მიხეილ სააკაშვილმა შს მინისტრის მოადგილე, ნათია მეზვრიშვილი შეურაცხმყოფელად და სექსისტურად მოიხსენია. ქართული ოცნების დეპუტატი კი მას ანტისემიტიზმში ადანაშაულებს.