მას შემდეგ, რაც 25 ივლისს, ერევანში, შეიარაღებულმა პირებმა, რომლებსაც პოლიციის შენობა 17 ივლისიდან აქვთ დაკავებული, პოლიციის ავტობუსი, მიკროავტობუსი და მსუბუქი ავტომობილი დაწვეს, დღეს კიდევ ერთ პოლიციის მანქანას წაუკიდეს ცეცხლი. ინფორმაციას Ekhokavkaza ავრცელებს.

როგორც ოპოზიციის წარმომადგენლები მომხდარს განმარტავენ, ეს არის პასუხი იმაზე, რომ პოლიციის შენობაში მყოფ ამბოხებულებს გათიშული აქვთ ელექტროენერგია და სათანადოდ არ აწვდიან საკვებს.

News.am-ის ცნობით კი, გასულ ღამეს პოლიციამ ცეცხლი გახსნა, რის შედეგადაც პოლიციის მიმდებარედ მყოფი აქციის მონაწილეები დაშავდნენ. ამის შესახებ ინფორმაციას დამფუძნებელთა პარლამენტი შესაბამისი განცხადების მეშვეობით ავრცელებს, სადაც მოუწოდებს მოსახლეობას გაერთიანებისკენ, რადგან "გამარჯვება სულ ახლოსაა":

"აღნიშნული პირები საავადმყოფოში გადაიყვანეს. დილის 7 საათისთვის კი არტურ სარქისიანმა თავის მანქანაში საკვები პროდუქტი ჩატვირთა და პოლიციის კორდონის გარღვევა სცადა, რის გამოც მასაც ცეცხლი გაუხსნეს. საბედნიეროდ, სარქისიანს დაზიანებები არ მოუღია და შეძლო ამბოხებულებისთვის საჭმლის გადაცემა".

აქციის მონაწილეების, რომლებიც პოლიციის შენობაში მყოფი ამბოხებულების მხარდასაწრად რამდენიმე დღე იკრიბებიან, ხელისუფლებას მოუწოდებენ ჩართონ პოლიციის შენობაში დენი და უზრუნველყონ თავდამსხმელები საკვებით.

17 ივლისს ოპოზიციური მოძრაობის - დამფუძნებელთა პარლამენტის მეთაურის, ჟირაირა სეფილიანის გათავისუფლების მოთხოვნით შეიარაღებული დაჯგუფება პოლიციის შენობაში შეიჭრა და მძევლები აიყვანა. გარდაიცვალა 1 პოლიციელი.

გასული დღეების განმავლობაში შენობის მიმდებარედ აღნიშნული ჯგუფის მხარდამჭერები აქციას მართავდნენ, რის შედეგადაც მომიტინგეებსა და პოლიციელებს შორის რამდენიმე შეტაკებაც მოხდა.

სომხეთში მიმდინარე ამბოხის შესახებ დეტალურ ინფორმაციას შეგიძლიათ გაეცნოთ აქ: