მირზა სუბელიანს სასამართლომ აღკვეთის ღონისძიებად პატიმრობა შეუფარდა. სასამართლომ პროკურატურის შუამდგომლობა რამდენიმე წუთის წინ დააკმაყოფილა.

პროკურატურის ყოფილი მაღალჩინოსნის, სუბელიანის ადვოკატი ამბობს, რომ საგამოძიებო უწყების შუამდგომლობა დასაბუთებული არ იყო.

მირზა სუბელიანი ხორავას ქუჩის საქმეზე დანაშაულის შეუტყობინებლობისთვის არის დაკავებული.

შსს-მ მირზა სუბელიანის დაკავების შესახებ ინფორმაცია გუშინ, 9 ივნისს გაავრცელა. ამავე საქმეზე დაკავებულია მერაბ მორჩაძეც.

მერაბ მორჩაძეს წარედგინა ბრალდება საქართველოს სისხლის სამართლის კოდექსის 372-ემუხლის მე-2 ნაწილით (მიწოდებული ინფორმაციის შეცვლის მიზნით მოწმის მოსყიდვა ქონებრივი სარგებლის შეთავაზებით). ხოლო მირზა სუბელიანს წარედგინა ბრალდება საქართველოს სისხლის სამართლის კოდექსის 376-ე მუხლით (განსაკუთრებით მძიმედანაშაულის შეუტყობინებლობა).

წარდგენილი ბრალდების მიხედვით, მორჩაძემ ხორავას ქუჩა #4-ის მიმდებარე ტერიტორიაზე მომხდარი მკვლელობის თვითმხილველ მოწმეზე მიხეილ კალანდიაზე გამოძიებისთვის მიცემული ინფორმაციის შეცვლის მიზნით განახორციელა ზემოქმედება.

მირზა სუბელიანისთვის წარდგენილი ბრალის თანახმად, პირველ დეკემბერს თბილისში, ხორავას ქუჩა #4-ის მიმდებარე ტერიტორიაზე ორი არასრულწლოვნის მკვლელობის შემდეგ მან გაიგო ერთ-ერთი არასრულწლოვნის, გ.ჯ.-ს დანაშაულის შესახებ და არ შეატყობინა სამართალდამცავ ორგანოებს.

გაიგეთ მეტი ხორავას ქუჩის საქმეზე.