Sputnik-ის ინფორმაციით, გაზპრომი ოკუპირებულ სამხრეთ ოსეთში შვილობილ კომპანიას ხსნის, რომელიც რეგიონის ენერგეტიკული მრეწველობის განვითარებაზე იქნება პასუხისმგებელი და მისი გაზიფიკაციით დაკავდება. ამის შესახებ დე-ფაქტო პრეზიდენტის, ლეონიდ თიბილოვისა და გაზპრომის თავჯდომარის მოადგილის, ვალერი გოლუბევის შეხვედრის შემდეგ გახდა ცნობილი.

გასული წლის ივნისში თიბილოვმა რეგიონის გენერალური გაზიფიკაციის შესახებ სქემა დაამტკიცა, რომელიც 200 დასახლებული პუნქტის გაზით მომარაგებას ითვალისწინებს. თიბილობის თქმით, სამხრეთ ოსეთი რუსეთის დახმარებას მიიღებს იმისთვის, რომ რეგიონში ცხოვრების დონე გაუმჯობესდეს და ომით გამოწვეული პრობლემები მოგვარდეს:

"ამიტომაც გაზიფიკაციის პროცესი ჩვენთვის ძალიან მნიშვნელოვანია. ჯერჯერობით მოსახლეობა არც ისე თავდაჯერებულად გრძნობს თავს. არის შემთხვევები, როდესაც ისინი საცხოვრებლად სხვა რეგიონებში გადადიან. ამავდროულად, ცხინვალში და უახლოეს დასახლებულ პუნქტებში, სადაც ბუნებრივი გაზი უკვე გაყვანილია, მოსახლეობა უფრო მშვიდადაა, მობილიზებულია მუშაობაზე და აქტიურად ირჯება თავის მიწაზე".

გოლუბევის განმარტებით კი, აღნიშნული გადაწყვეტილება რუსეთის პრეზიდენტისა და ენერგეტიკის მინისტრის დავალებების შესასრულებლად კეთდება და რეგიონის ენერგეტიკულ განვითარებას ისახავს მიზნად. მისი თქმით, გაზპრომი სხვადასხვა ვარიანტებს განიხილავდა, თუმცა საბოლოოდ იმ ვარიანტზე შეჩერდნენ, რომელიც ბელორუსში ყირგიზეთსა და სომხეთშია აპრობირებული:

"იქ არის ჩვენი შვილობილი კომპანიები, რომლის ფუნქციონირებაზეც მთელი ფინანსური, ეკონომიკური და იურიდიული პასუხისმგებლობა გაზპრომს აქვს დაკისრებული".

მისი განმარტებით, შეხვედრაზე მხოლოდ ტექნიური საკითხები განიხილეს. მან განაცხადა, რომ კარგი იქნებოდა თუ ყველა პროცედურა სექტემბრისთვის დასრულდებოდა იმისთვის, რომ გაზპრომმა საჭირო თანხების 2017 წლის ბიუჯეტში გათვალისწინება შეძლოს.