ვიცე-პრემიერმა და ენერგეტიკის მინისტრმა კახი კალაძემ მარგველაშვილისა და პაპუაშვილის განცხადებებს, ზეწოლასთან დაკავშირებით, ჭორაობა უწოდა და ამავე კონტექსტში, "ქალების ჭორაობა" ახსენა:

"პრეზიდენტის განცხადება არ მომისმენია, თუმცა საეჭვოდ დაემთხვა ბატონ პაპუაშვილის განცხადებასაც. ზოგადად, გაუგებარია, რადგან როცა მე ამ განცხადებებს ვისმენ, მგონია რომ ეს პოლიტიკური სპეკულაციებია. დღემდე არ მისულა ბატონი პაპუაშვილი პროკურატურაში და ჩემი აზრით, საქმე გვაქვს ჭორიკნობასთან, როდესაც ქალბატონები ჭორაობენ".

21 ივლისს, საკონსტიტუციო სასამართლოს თავჯდომარემ, გიორგი პაპუაშვილმა განაცხადა, რომ სასამართლოს მოსამართლეებზე და მათ ახლობლებზე ზეწოლა, თვალთვალი და მუქარა მიმდინარეობს.

დღეს, 25 ივლისს, პრეზიდენტმა მარგველაშვილმა თქვა, რომ პაპუაშვილის მონათხრობმა ის არ გააოცა, რადგან სამართალდამცავების მხრიდან 1 თვის წინ მისი ოჯახის წევრზეც იყო ზეწოლის განხორციელების მცდელობა:

"ეს იყო ზეწოლა ჩემი ოჯახის წევრზე რომელიც გააჩერეს ქუჩაში და მერე მის სახლში ჩაატარეს ჩხრეკა ყოველგვარი სასამართლოს დადგენილების გარეშე, რაღაცა იმედით, რომ ამას რაღაც მოჰყვებოდა. ბუნებრივია, აბსოლუტურად სუფთა იყო ყველაფერი და არანაირი სამართალ დარღვევა არ იყო, მაგრამ იქ იყო გარკვეული მინიშნებები რომ ეს არის სწორედ ამ პიროვნებაზე ზეწოლის მცდელობა."

მთავარმა პროკურატურამ განცხადება გაავრცელა იმის შესახებ, რომ პროკურორი ირაკლი შოთაძე მზადაა დეტალური ინფორმაციის მისაღებად დაუყონებლივ შეხვდეს საქართველოს პრეზიდენტს გიორგი მარგველაშვილსა და საკონსტიტუციო სასამართლოს თავმჯდომარეს გიორგი პაპუაშვილს.