კანადაში მარიხუანის მოხმარება ლეგალური გახდა. კანონი, რომელსაც მხარი 52 სენატორმა დაუჭირა მხარი, ხოლო 29 წინააღმდეგი იყო, ქვეყნის ტერიტორიაზე მარიხუანის გავრცელებასა და გაყიდვას არეგულირებს.

ქვეყანაში მარიხუანის კანონიერად შეძენა და მოხმარება 2018 წლის სექტემბრიდან იქნება შესაძლებელი. გარდა ამისა, მარიხუანის შეძენა ხელმისაწვდომი იქნება ელექტრონულად.

კანადა გახდა პირველი ქვეყანა "დიდი შვიდეულიდან", რომელმაც მარიხუანის ლეგალიზებას დაუჭირა მხარი. მარიხუანის შენახვა ქვეყანაში 1923 წელს აიკრძალა, თუმცა 2001 წელს მისი სამედიცინო დანიშნულებით გამოყენება დასაშვები გახდა.

სტატისტიკის თანახმად, 2015 წელს კანადელებმა მარიხუანაზე 6 მილიარდი კანადური დოლარი (4,5 მილიარდი აშშ დოლარი) დახარჯეს - დაახლოებით, ამდენივე დახარჯეს მათ ღვინოზე.

ახალი კანონის მიღების შემდეგ ადგილობრივ და რეგიონულ მთავრობებს 8-12 კვირა ექნებათ იმისათვის, რომ მარიხუანის გაყიდვის წესები და პირობები დააწესონ.

ზრდასრულ მოქალაქეებს უფლება ექნებათ თან 30 გრამი გამომხმარი მარიხუანა იქონიონ. ჯერჯერობით არ იქნება ხელმისაწვდომი მარიხუანის შემცველი პროდუქტები, მათი გაყიდვა კანონის ძალაში შესვლიდან ერთი წლის განმავლობაში დაიწყება. მარიხუანის შეძენის მინიმალური ასაკი 18 წელია, ხოლო ზოგიერთ პროვინციაში 19.

ასაკობრივი შეზღუდვის გარდა, რეგიონულ მთავრობებს საშუალება ექნებათ სხვა შეზღუდვებიც დააწესონ - მაგალითად, სად იქნება შესაძლებელი მარიხუანის მოწევა.

ფედერალურმა მთავრობამ უკვე დააწესა შეფუთვის წესები: მინიმალური ბრენდინგი და სავალდებულო გაფრთხილება მოწევის საფრთხის შესახებ. კანონით, ასევე, შეზღუდულია ახალგაზრდებში რეკლამა და რეკლამაში ცნობილი პირების, გამოგონებული პერსონაჟების ან ცხოველების გამოყენება.

როგორც ადრე, აკრძალული იქნება 30 გრამზე მეტი გამომხმარი მარიხუანის თან ქონა, სახლში ოთხ ძირზე მეტის მოყვანა და მარიხუანის შეძენა ისეთი მომწოდებლისგან, რომელსაც ლიცენზია არ აქვს.

კანონდარღვევისთვის განსაზღვრულია მკაცრი სასჯელი: მაგალითად, არასრულწლოვანისათვის მარიხუანის მიყიდვა 14 წლამდე პატიმრობით დაისჯება.