"თქვენი ხელწამოსაკრავი ნამდვილად არ არის ქალბატონი თეა წულუკიანი. გირჩევნიათ, თქვენი იუსტიციის მინისტრი გამოიძახოთ, ჩამოვიდეს და პასუხები გასცეს საზოგადოებას და მართლმსაჯულებას", - ამ რეპლიკით ქართული ოცნების დეპუტატმა, არჩილ თალაკვაძემ ენმ-ის დეპუტატ სალომე სამადაშვილს უპასუხა.

სამადაშვილმა მანამდე თქვა, რომ იუსტიციის მინისტრი, თეა წულუკიანი არის "უსამართლობის სისტემის შემოქმედი". მანვე აღნიშნა, რომ ხორავას საქმის დროებითი საგამოძიებო კომისიის შექმნას აზრი არ აქვს, მანამ სანამ თეა წულუკიანია ხელისუფლებაში:

"[წულუკიანი] მუშაობს პირდაპირ ბიძინა ივანიშვილზე, მისი პოლიტიკური დაკვეთების შესასრულებლად, არის ხელშეუხებელი მინისტრი თქვენს ხელისუფლებაში".

დღეს, 6 ივნისს პარლამენტის რიგგარეშე სხდომაზე ხორავას ქუჩაზე არასრულწლოვნების მკვლელობის საქმის დროებითი საგამოძიებო კომისიის შემადგენლობაზე მსჯელობენ. საკითხს პარლამენტმა დღესვე უნდა უყაროს კენჭი. ერთიანი ნაციონალური მოძრაობა კომისიას უნდობლობას უცხადებს და მის შექმნას მხარს არ უჭერს.