ხორავას ქუჩაზე მოკლული ლევან დადუნაშვილის მამა დავით დადუნაშვილი ვაკის პარკში გამართულ აქციაზე მივიდა. მან აქციაზე შეკრებილ პირებს მადლობა გადაუხადა.

მისი თქმით, ის იმყოფებოდა პრემიერთან შეხვედრაზე და უფლება არ ჰქონდა აქციაზე არ მოსულიყო.

"ერთი ისაა, რომ მაჩალიკაშვილიც და ზაზაც სიმართლეს ეძებენ. ის სიმართლე მათ აუცილებლად უნდა გაიგონ. უყურადღებობა რომაა დაშვებული, ამას მთავრობა არ უარყოფს. მე მჯერა რომ ისინი ამას ყურად იღებენ და გამოასწორებენ", - განაცხადა დავით დადუნავილა.

ის გამოეხმაურა ვაკის პარკში მიმდინარე აქციაზე, სახალხო დამცველის ნინო ლომჯარიას შეურაცხყოფის ფაქტს.

"ნინო ლომჯარიას მიმართ ასე არ უნდა მოქცეულიყავით, მან ჩემთვის და ამ საქმისთვის ბევრი გააკეთა. კაცები, ახალგაზრდები, ქართველი კაცები იმით გამოირჩევიან, რომ ქალების მიმართ ყოველთვის უფრო მიმტევებლები უნდა იყვნენ. ეს მინდოდა აღმენიშნა. თქვენ კიდევ ერთხელ დიდ მადლობას მოგახსენებთ", - განაცხადა დადუნაშვილმა.