25 მარტის მთავრობის სხდომის დაწყების წინ, პრემიერ მინისტრმა გიორგი კვირიკაშვილმა განათლების რეფორმის ახალ მოდელზე ისაუბრა. მისი თქმით, განათლება ოთხპუნქტიანი გეგმის ერთ-ერთი უმნიშვნელოვანესი მიმართულება.

"განათლების რეფორმის პირველი ბლოკი, გახლავთ პროფესიული განათლების სრულიად ახლებური მოდელი, რომელიც დამსაქმებელთან ერთად და სახელმწიფოსა და კერძო სექტორს შორის პარტნიორობის მოდელზე აგებულ განათლების სისტემას ნიშნავს",- განაცხადა გიორგი კვირიკაშვილმა.

მისივე განმარტებით, აღნიშნული მოდელი ნიშნავს უფრო მეტ კვალიფიცირებულ, კონკურენტუნარიან პროფესიონალს და მეტ დასაქმებულს ქვეყანაში.

"ნიშანდობლივია, რომ პირველი ამ ოთხპუნქტიან რეფორმათა გეგმიდან წარდგენილია ზუსტად განათლების რეფორმა, რომელიც ვფიქრობ, რომ მართლაც ყველაზე მნიშვნელოვანია ამ ოთხ მიმართულებას შორის", - ამბობს გიორგი კვირიკაშვილი.