თბილისის სატრანსპორტო კომპანია მიმართავს მეტროს მემანქანეების გაერთიანებას, ერთობა 2013-ს, თავი შეიკავონ უვადო გაფიცვისა და შიმშილობისგან. კომპანიის განცხადებით, მემანქანეების ეს გადაწყვეტილება კანონს ეწინააღმდეგება, რადგან სასამართლოს 18 მაისის გადაწყვეტილებით, მათ დროებით ეს უფლება შეზღუდული ჰქონდათ.

"სასამართლოს გადაწყვეტილების მიზანი იყო მხოლოდ დავის განხილვის პერიოდში მემანქანეების მხრიდან გაფიცვის უფლების დროებითი შეზღუდვა და მეტროპოლიტენის ჩვეულ რეჟიმში გამართულად ფუნქციონირება, რათა თავიდან ყოფილიყო აცილებული საფრთხე და მოსახლეობისთვის მნიშვნელოვანი საქმიანობების პარალიზება. სატრანსპორტო კომპანია მოუწოდებს მემანქანეებს მხედველობაში მიიღონ მოსახლეობის უსაფრთხოდ გადაადგილების მიზნით სასამართლოს მიერ გამოტანილი დროებითი ღონისძიების მნიშვნელობა და თავი შეიკავონ კანონსაწინააღმდეგო ქმედებებისგან", - წერია კომპანიის განცხადებაში.

მეტროს მემანქანეები დღეს გაიფიცნენ და უვადო შიმშილობა დაიწყეს, რაც მათი თქმით, 4 ივნისს მეტროს სრულმასშტაბიან პარალიზებას გამოიწვევს.

მეტროს მემანქანეებმა გაფიცვა, დღეს 15:00-დან გლდანის დეპოში დაიწყეს.

იმ მეტროს მემანქანეების განცხადებით, რომლებმაც შიმშილობა დაიწყეს, იმუშავებენ მანამდე, სანამ მათ სამუშაოს გაგრძელების საშუალებას ჯანმრთელობის მდგომარეობა მისცემს, რაც მეტროპოლიტენის შიდაგანაწესში მკაცრად არის გაწერილი. გაიგეთ მეტი.