თბილისის მერის კახა კალაძის განცადებით, მეტროს მემანქანეები, რომლებმაც დღეს, სამ მაისს გაფიცვა და შიმშილობა დაიწყეს, მოსახლეობას და თბილისის მერიას შანტაჟის ენით ელაპარაკება.

კახა კალაძის განცხადებით, ამ ეტაპზე მეტროს მემანქანეებისთვის ხელფასის მომატება შეუძლებელია.

"ვიცით, რომ სატრანსპორტო კომპანია ყოველწლიურად დაახლოებით 16 მილიონი ლარით გადის მინუსში, რაც სერიოზულ პრობლემას წარმოადგენს. მემანქანეები, რომელთა ხელფასები 1400-დან 1800 ლარამდე მერყეობს, გამოდიან და შანტაჟის ენით გველაპარაკებიან. ეს არ არის ჩემთან მიმართებაში საუბარი", - განაცხადა კახა კალაძემ.

თბილისის მერის თქმით, მემანქანეები შანტაჟის ენით ელაპარაკებიან დედაქალაქის მოსახლოებას, 400 ათას ადამიანს, ვინც ყოველდღიურად მეტროთი გადაადგილდება და ეუბნებიან, რომ 1400, 1600, 1800 ლარი მათთვის საკმარისი არ არის და ხელფასი 45%-ით მოვუმატოთ.

"ვსვამ ძალიან მარტივ კითხვას - ვკითხოთ იმ 400 ათას ადამიანს, რამდენია მათი საშუალო ხელფასი და ამით ყველაფერი იქნება ნათქვამი. ეს არ არის სწორი ფორმა. ჩვენ არავითარ შემთხვევაში შანტაჟის ენით საუბარს არ დავუშვებთ იმიტომ, რომ ეს არის თქვენს მიერ, ჩვენს მიერ, ჩვენი მოქალაქეების მიერ ხელფასებიდან გადახდილი გადასახადები, რომელიც ცენტრალურ ბიუჯეტში მიდის და შემდეგ მუნიციპალიტეტში გადმოდის", - აცხადებს კახა კალაძე.

მისივე განცხადებით, მერიას თანხების მენეჯმენტი და სწორად გადანაწილება ევალება და ამ ეტაპზე არანაირი შესაძლებლობა არ არსებობს ამის, რომ მემანქანეებს ხელფასი 45%-ით გაიზარდოს.

მისივე თქმით, დედაქალაქის მერია ისეთ გადაწყვეტილებას არ მიიღებს, რომელიც ქალაქს დააზიანებს: "გარდა მემანქანეებისა, ჩვენთან დაახლოებით 24 ათასი ადამიანი მუშაობს. არის ძალიან საპასუხისმგებლო თანამდებობები, თუნდაც ბაღის პედაგოგები, თბილსერვისის თანამშრომლები, მერიის თანამშრომლები, რომლებსაც ორჯერ და ოთხჯერ ნაკლები ხელფასები აქვთ და ამ ადამიანებს რა ვუპასუხოთ? მე ნამდვილად არ და ვერ მივიღებ ისეთ გადაწყვეტილებას, რომელიც ჩვენ ქალაქს და ყველა იმ ადამიანს დააზიანებს, რომელიც ამ სისტემაში მუშაობს".

დედაქალაქის მერის თქმით, მემანქანეებს გაფიცვის კანონიერი უფლება არ აქვთ და იმ შემთხვევაში თუ მაინც გაიფიცებიან, თბილისის მთავრობა კანონის ფარგლებში იმოქმედებს.

"სასამართლომ გადაწყვეტილება გამოიტანა, მემანქანეებს გაფიცვის უფლება დროებით შეუჩერა იმიტომ, რომ ჯერ საქმე განხილვის პროცესშია. სანამ ეს გადაწყვეტილება არ იქნება მიღებული, მემანქანეებს გაფიცვის უფლება არ აქვთ. თუმცა თუ ისინი გადაწყვეტილებას მაინც მიიღებენ, ჩვენც კანონის ფარგლებში ვიმოქმედებთ და ყველა ის მიმართულება იქნება განხორციელებული, რომელიც კანონს ეწინააღმდეგება, ეს იქნება ხელფასების დაკავება და ა.შ.", - განაცხადა დედაქალაქის მერმა.

მეტროს მემანქანეები გაიფიცნენ და უვადო შიმშილობა დაიწყეს, რაც მათი თქმით, 4 ივნისს მეტროს სრულმასშტაბიან პარალიზებას გამოიწვევს.

მემანქანეთა გაფიცვა

შპს თბილისის სატრანსპორტო კომპანიასთან კოლექტიური შრომითი დავა რამდენიმე თვეა მიმდინარეობს, რომლის ფარგლებში მიმდინარე მოლაპარაკებების წარუმატებლობის გამო, მეტროს თანამშრომლებმა კანონმდებლობით დადგენილი წესით 2018 წლის 3 მაისს გაფიცვა დააანონსეს, რომელიც თბილისის საქალაქო სასამართლოს მიერ 30 დღის ვადით 2018 წლის 3 ივნისამდე გადაიდო.

2018 წლის 21 მაისს თბილისის საქალაქო სასამართლომ, ამჯერად განუსაზღვრელი ვადით შეზღუდა პროფესიულ გაერთიანების წევრი მეტროს მემანქანეების გაფიცვაში მონაწილეობის მიღების უფლება "სამუშაო საათების განმავლობაში".