პროკურატურამ დღეს, 29 მაისს ხორავას ქუჩაზე მომხდარი მოზარდების მკვლელობის საქმეზე მასალები გაასაჯაროვა და განაცხადა, რომ შემთხვევის ადგილიდან მხოლოდ სამედიცინო მაკრატელი ამოიღეს. უწყების ცნობით, მათ დაადგინეს, რომ ეს მაკრატელი ადგილზე მისულ სასწრაფო სამედიცინო დახმარების ბრიგადას ეკუთვნოდა, რომელთაც დარჩათ ეს ნივთი:

"ჩატარებული ყველა სხვა საგამოძიებო მოქმედებით, სხვა მაკრატლის ან მსგავსი საგნის არსებობა არ დგინდება".

პროკურატურა აცხადებს, რომ ექსპერტიზის დასკვნა გამორიცხავს, როგორც მაკრატლის, ასევე მსგავსი ბლაგვი ბოლოების მქონე საგნის გამოყენებას მკვლელობის იარაღად.

პროკურატურა ასევე ამტკიცებს, რომ შემთხვევის ადგილის დათვალიერებისას ამოიღეს შავტარიანი გასაშლელი დანა სისხლის ლაქებით.

"ხსენებულ დანაზე გამოძიების მიერ ჩატარდა ყველა საჭირო ექსპერტიზა, მათ შორის ბიოლოგიური ექსპერტიზა, რომლის შედეგადაც დანაზე აღმოჩნდა მოკლული დავით სარალიძისა და ერთ-ერთი ბრალდებულის ბიოლოგიური მასალა (დნმ). უტყუარად დადგენილია, რომ ამ დანით ბრალდებულმა გ.ჯ-მ მოკლულ სარალიძეს რამოდენიმეჯერ მიაყენა ჭრილობა".

რაც შეეხება მეორე დანას, გამოძიება ირწმუნება, რომ ის თბილისში მდებარე ერთ-ერთი კორპუსის ნანგრევებთან არსებული სამალავიდან ამოიღეს.

"დანა ბრალდებულმა მოწმეს მისცა დასამალად. ხსენებულ დანაზე, ბიოლოგიური ექსპერტიზის დასკვნის თანახმად აღმოჩნდა მოკლული ლევან დადუნაშვილისა და ბრალდებულის ბიოლოგიური მასალა (დნმ), ხოლო ერთჯერად ხელსახოცზე, რომელშიც დანა იყო გადახვეული, აღმოჩნდა გარდაცვლილ დავით სარალიძის ბიოლოგიური მასალა. უტყუარად დადგენილია, რომ ამ დანით ბრალდებულმა გ.ბ-მ ორივე მოკლულს რამოდენიმეჯერ მიაყენა ჭრილობა".

მკვლელობაში ბრალდებული არასრულწლოვნის ადვოკატმა, ტარიელ კაკაბაძემ დღეს, პროკურატურის ბრიფინგის შემდეგ ჟურნალისტებს უთხრა, რომ ბრალდების მხარის განმარტებები საზოგადოების შეცდომაში შეყვანას ისახავს მიზნად:

"[დამოუკიდებელმა] ექსპერტმა ასეთი რამ თქვა, რომ გამოყენებულია სხვადასხვა საგნები, რომლებიც არ არის დანა. გამოყენებულია სხვადასხვა მჭრელი ბასრი საგნები, რომლებიც კატეგორულად ვაცხადებ, რომ არ არის საქმეში არსებული დანებიო, აი ეს თქვა ექსპერტმა. თუმცა, ამ საგნებში შესაძლებელია რომელიმე იყოს მაკრატლის მსგავსი საგანიო, აი ეს თქვა ექსპერმა და აპრიორი, რომ საქმეში მაკრატელია გამოყენებული, ასეთი რამ ექსპერტს არსად არ უთქვამს. რაც შეეხება სისხლის სამართლის მასალების გამოქვეყნებას, ამის უფლება არც ბრალდების მხარეს არ ჰქონდა და ამის უფლება არც დაცვის მხარეს არა აქვს".

დამოუკიდებელი ექსპერტის, მაია ნიკოლეიშვილის დასკვნაში წერია, რომ ხორავას ქუჩაზე მოკლულ ორ მოზარდს ჭრილობები დანის გარდა, სხვა ბასრი საგნებითაც ჰქონდათ მიყენებული.