თბილისის მეტროს მემანქანეები, რომლებსაც თბილისის საქალაქო სასამართლომ გაფიცვის უფლება შეუჩერა, ამ განჩინებას გაასაჩივრებენ. ამის შესახებ On.ge-ს სასამართლოში მათი უფლებების დამცველ ორგანიზაციაში, ადამიანის უფლებათა მონიტორინგისა და სწავლების ცენტრში განუცხადეს.

ბოლო ერთი თვის განმავლობაში ეს უკვე მეორე შემთხვევაა, როცა სასამართლომ მეტროს თანამშრომლებს გაფიცვა აუკრძალა. როგორც EMC-ის იურისტი, ეთერ გვრიტიშვილი ამბობს, სასამართლომ წინა შემთხვევაში შრომის კოდექსით იხელმძღვანელა, ახლა კი ზოგადი საპროცესო კოდექსით.

"შრომის კოდექსი ითვალისწინებს გაფიცვის 30-დღემდე აკრძალვას, ზოგადი საპროცესო კოდექსი კი, შესაძლებლობას იძლევა, რომ მოპასუხე მხარეს შეეზღუდოს და ეკრძალოს კონკრეტული მოქმედების განხორციელება", - განუცხადეს On.ge-ს ადამიანის უფლებათა მონიტორინგისა და სწავლების ცენტრში.

დღეს, 22 მაისს, 19 საათზე მეტროს თანამშრომლების სოლიდარობის აქცია გაიმართება.

მემანქანეების გაფიცვა

შპს თბილისის სატრანსპორტო კომპანიასთან კოლექტიური შრომითი დავა რამდენიმე თვეა მიმდინარეობს, რომლის ფარგლებში მიმდინარე მოლაპარაკებების წარუმატებლობის გამო, მეტროს თანამშრომლებმა კანონმდებლობით დადგენილი წესით 2018 წლის 3 მაისს გაფიცვა დააანონსეს, რომელიც თბილისის საქალაქო სასამართლოს მიერ 30 დღის ვადით 2018 წლის 3 ივნისამდე გადაიდო.

2018 წლის 21 მაისს თბილისის საქალაქო სასამართლომ, ამჯერად განუსაზღვრელი ვადით შეზღუდა პროფესიულ გაერთიანების წევრი მეტროს მემანქანეების გაფიცვაში მონაწილეობის მიღების უფლება "სამუშაო საათების განმავლობაში".

ამავე თემაზე: