მელანია ტრამპის სფიჩრაიტერმა აღიარა, რომ სიტყვა, რომლის გამოც დონალდ ტრამპის ცოლი სკანდალში გაეხვა, მისი დაწერილი იყო და შეცდომა სწორედ მან დაუშვა. რამდენიმე დღის წინ, აშშ–ს რესპუბლიკური პარტიის პრეზიდენტობის კანდიდატის, დონალდ ტრამპის ცოლმა სიტყვით გამოსვლისას სიტყვასიტყვით გაიმეორა მიშელ ობამას მიერ 2008 წელს საჯაროდ წარმოთქმული ფრაზები. მსგავსება იმდენად ცხადი იყო, რომ უკვე რამდენიმე დღეა, მსოფლიო მედიის ყურადღება ამ ამბისკენაა მიმართული.

დონალდ ტრამპმა კი ტვიტერზე მედია არაჯანსაღ ინტერესში დაადანაშაულა: "მედია იმაზე მეტ დროს ხარჯავს მელანიას წარმოთქმული სიტყვის გამოძიებაში, ვიდრე ეს გამოძიების ფედერალურმა ბიურომ დახარჯა კლინტონის მეილების გამოსაძიებლად".

სფიჩრაიტერის თქმით, ის ტრამპების ოჯახის დიდი ხნის მეგობარია და მათთან უკვე წლებია მუშაობს. მისივე განმარტებით, გამოსასვლელი სიტყვის მომზადებისას, მელანია ტრამპთან სატელეფონო საუბარში ის განიხილავდა მისი ცხოვრების დეტალებს, იმ ადამიანებს, ვინც მასზე ყველაზე დიდი გავლენა მოახდინეს.

"ადამიანი, რომელიც მას ყოველთვის მოწონდა, მიშელ ობამაა. სატელეფონო საუბრისას მან მიშელ ობამას სიტყვიდან წამიკითხა გარკვეული პასაჟები მაგალითის სახით".

სფიჩრაიტერი მერედიტ მელვერი განმარტავს, რომ მან აღნიშნული ფრაზები ჩაიწერა, რის შემდეგაც მელანია ტრამპის საჯაროდ წარმოსათქმელმა სიტყვამ საბოლოო სახე მიიღო. მელვერის მტკიცებით, მას მიშელ ობამას სიტყვები არ წაუკითხავს და შეცდომა დაუშვა.

როგორც გაირკვა, დონალდ ტრამპმა სფიჩრაიტერის განცხადება გადადგომის შესახებ, არ დააკმაყოფილა და დაამშვიდა ის, რომ "ადამიანები ასეთ გამოცდილებაზე იზრდებიან".

მერედიტ მელვერმა საჯაროდ მოუხადა ბოდიში ტრამპებს მსგავს "ქაოსში" გახვევისთვის.