შეწყალების კომისიის თავმჯდომარის, ზვიად ქორიძის განცხადებით, უვადო პატიმარს შეწყალების მოთხოვნის უფლება აქვს. მისი თქმით, ამ კუთხით, ორი წლის წინ პრეზიდენტმა დებულებაში ცვლილებაც შეიტანა:

"პრეზიდენტის ინიციატივით, 25 წლიანმა ვადამ დაიწია 15 წლამდე და უვადო მსჯავრდებულების საკითხს, რომლებსაც 15 წელი საპატიმრო სასჯელი აქვთ მოხდილი, შეწყალების კომისია არსებითად განიხილავს".

მისი თქმით, კომისია ისედაც განიხილავს უვადო მსჯავრდებულთა საკითხებს და რეკომენდაციებს წარუდგენს პრეზიდენტს.

ქორიძის განმარტებით, პრეზიდენტმა ორი წლის განმავლობაში 8 უვადო მსჯავრდებული შეიწყალა :

"ეს პროცესი გრძელდება და შეწყალების კომისიაში მუდმივად შემოდის ამა თუ იმ უვადო მსჯავრდებულის საკითხი. ბუნებრივია, უვადო მსჯავრდებულთა დანაშაულები, რის გამოც მათ მსჯავრი დაედოთ, საკმაოდ მრავალმხრივია და დანაშაულების საკმაოდ ფართო სპექტრია. კომისია ცალკეული ამ დანაშაულების დეტალებსაც სწავლობს. ხშირად ყოფილა, როდესაც ჩვენ შევხვდით უვადო მსჯავრდებულებს და ვესაუბრეთ და ამის შემდგომ გარკვეული გადაწყვეტილება გამოუტანია კომისიას და შემდგომ პრეზიდენტს".

20 მარტს, საკვირაო ქადაგებისას, პატრიარქმა ხელისუფლებას უვადო პატიმრობის წესის გადახედვისკენ მოუწოდა. ილია მეორის განცხადებით, თუ პატიმარი გამოსწორების გზაზე დადგა, შრომობს და სიკეთეს აკეთებს, მას შესაძლებელია შეეცვალოს უვადო პატიმრობა და დაუწესდეს გარკვეული ვადა.