საპატრიარქოს ტელევიზია ერთსულოვნების საზოგადოებასთან ურთიერთობის სამსახურის ხელმძღვანელის, თამარ არჩვაძის მოსაზრებით, ვიდეომიმართვა, სადაც ადამიანთა ნაწილს ცხოველებს ადარებენ იმის გამო, რომ ისინი ეკლესიაში არ დადიან, შეურაცხმყოფელი არ არის. ამის შესახებ მან On.ge-ს განუცხადა. მისი თქმით, "ეს არის ღრმა სულიერი თემა, რომელსაც მოძღვარი უკეთ ახსნის":

"გააჩნია ადამიანი რა ინსტინქტებით ცხოვრობს. აქ უბრალოდ მოწოდებულია ის, თუ როგორი უნდა იყოს ეკლესიური ადამიანი და მეტი არაფერი. განმარტებულია ადამიანის უპირველესი დანიშნულება სულიერი მდგომარეობიდან გამომდინარე, როდესაც ადამიანს აქვს სული, ღმერთმა მისცა სიყვარულის უნარი, ლოცვის უნარი და ცხონებისთვის გზა. ყველა ადამიანს აქვს ეს განურჩევლად, სქესის რელიგიის, კულტურის და ა.შ".

თამარ არჩვაძის თქმით, საქართველოს მართლმადიდებელი ეკლესიის საპატრიარქო ადამიანებს მხოლოდ სიყვარულით ექცევა: "ქრისტიანობა ქადაგებს სიყვარულს და ვინაიდან ვართ საპატრიარქოს წარმომადგენლები, არასდროს არ გავაკეთებთ იმას, რომ სიყვარულის იქით მოვექცეთ ადამიანს. მე შემიძლია ვთქვა, ეს შეიძლება იყოს ინტერპრეტირებული და მსგავსი შინაარსის ვიდეოს უბრალოდ ვერ გავუშვებდით".

საქართველოს მართლმადიდებელი ეკლესიის საპატრიარქოს ტელეარხ ერთსულოვნების ეთერში გადის პროპაგანდისტული, დისკრიმინაციული შინაარსის ვიდეომიმართვა, სადაც ადამიანები, რომლებიც ეკლესიაში არ დადიან, ცხოველებს არიან შედარებული. ვიდეოში ისმის შემდეგი შინაარსის ტექსტი: "თუ ადამიანი არ დადის ეკლესიაში, ნუ მიწყენთ და, იგი ემსგავსება ცხოველს. თვითონ დაფიქრდით, მთელი კვირის განმავლობაში, იგი როგორც ცხოველი მუდმივად დაკავებულია საკვების მოპოვებით. მუშაობს, რომ გამოკვებოს საკუთარი თავიც და ოჯახიც. მას სძინავს, სძინავს მხეცსაც. ის ჭამს, ჭამს პირუტყვიც. ისვენებს, დასვენება სჭირდება ოთხფეხასაც. მაშ, რა განსხვავებაა?"