"ჩვენი თავისუფლებისთვის" - ამ სახელწოდების აქცია მიმდინარეობს რუსთაველის გამზირზე, პარლამენტის შენობის წინ. თეთრი ხმაუროს მოძრაობის წევრებმა და მხარდამჭერებმა 12 მაისს თბილისის კლუბებში ჩატარებული სპეცოპერაციების შემდეგ მკაცრი ნარკოპოლიტიკის გასაპროტესტებლად აქცია დაგეგმეს.

ფოტო: დიმიტრი სანაია / On.ge

ფოტო: დიმიტრი სანაია / On.ge

ფოტო: დიმიტრი სანაია / On.ge

რესპუბლიკური პარტიის წევრი თამარ კორძაია, რომელიც აქციას ესწრება On.ge-სთან საუბარში ამბობს, რომ ხელისუფლების ადეკვატური ღონისძიება იქნებოდა, რეალური გამსაღებლები და მათი მფარველები დააკავოს და არ გადატეხოს ჯოხი ყველაზე დაბალ რგოლზე:

"ჩაატარეს სრულიად არაადეკვატური სპეცოპერაცია, როდესაც საჭირო არ იყო. 70-მდე ადამიანი წაასხეს, მერე ისევ გამოუშვეს. ხელისუფლება გადავიდა მკაცრი ხელის პოლიტიკის განხორციელებაზე, რაც უკვე კრიზისში მყოფი ხელისუფლებისთვისაა დამახასიათებელი. ხელისუფლება უშვებს შეცდომას და ეს იქნება ფატალური. არაფრის გულისთვის დარბევა და ცემა არ ეპატიება არცერთ ხელისუფლებას".

აქციის ორგანიზატორების მოთხოვნებია:

  • დატოვოს თანამდებობა პრემიერ-მინისტრმა გიორგი კვირიკაშვილმა;
  • გადადგეს შს მინისტრი;
  • დაისაჯოს 12 მაისის "შავი პარასკევის" ოპერაციაზე პასუხისმგებელი ყველა პირი;
  • "მმართველ ძალაში ჯერ კიდევ ხალხის მხარეს მდგომი პოლიტიკოსები გაემიჯნონ ხელისუფლების მიერ არჩეულ მცდარ კურსს".

თეთრი ხმაურის მოძრაობის წევრებმა კლუბებში ჩატარებულ სპეცოპერაციებთან დაკავშირებით პრესკონფერენციაზე განაცხადეს, რომ 12 მაისის ღამის მოვლენები ძალიან ახლოს იდგა წინა ხელისუფლების პერიოდის გამოცდილებასთან.

12 მაისს, შუაღამისას, სპეცრაზმი კლუბ ბასიანსა და კაფე გალერეაში შევიდა. სამართალდამცავებმა შენობაში მყოფი ადამიანები გარეთ გამოიყვანეს და საგამოძიებო ღონისძიებების განხორციელება დაიწყეს. შსს-ს განმარტებით, მათ კლუბის ტერიტორიაზე რვა ნარკორეალიზატორი დააკავეს. დაპირისპირება იყო პოლიციელებსა და მოქალაქეებს შორის კლუბ ბასიანთან და პარლამენტის წინ. ადმინისტრაციული წესით დააკავეს 50-მდე პირი.