დისკუსია თემაზე, არის თუ არა პლუტონი პლანეტა, ჯერ კიდევ არ დასრულებულა და შესაძლებელია, რომ მან პლანეტის სტატუსი დაიბრუნოს.

2006 წელს საერთაშორისო ასტრონომიულმა გაერთიანებამ (International Astronomical Union) პლუტონი "ჩამოალაბორანტა" და მას ჯუჯა პლანეტის სტატუსი მიანიჭა. მათი აზრით, პლუტონი არ აკმაყოფილებდა ნამდვილი პლანეტის ყველა კატეგორიას. ამ გადაწყვეტილების მიღების შემდეგ, პლუტონის ერთგული მხარდამჭერები (მაგალითად, ჯერი სმიტი) და ბევრი ასტროფიზიკოსი იბრძოდა პლუტონისათვის თავდაპირველი სტატუსის დაბრუნებისათვის.

მეცნიერებმა, ალან სტერნმა და დევიდ გრინსპუნმა, გამოაქვეყნეს სტატია, რათა პლუტონს დაუბრუნონ ყოფილი დიდება თუ არა, პლანეტის სტატუსი მაინც.

2006 წელს IAU-მ შემოიღო სამი კრიტერიუმი, რომელსაც უნდა აკმაყოფილებდეს ციური სხეული იმისათვის, რომ მას პლანეტის სტატუსი მიენიჭოს. პირველ რიგში, ციური სხეული მზის გარშემო უნდა მოძრაობდეს, მეორე - მას უნდა ჰქონდეს საკმარისი გრავიტაციული ძალა იმისათვის, რომ თავი "დაიმრგვალოს" და მესამე - მის გარშემო სივრცე სხვა ციური სხეულებისგან თავისუფალი უნდა იყოს. პლუტონი მისი მსგავსი ყინულოვანი ობიექტებითაა გარშემორტყმული, შესაბამისად, ვერ აკმაყოფილებს მესამე კრიტერიუმს და სწორედ ამიტომ არ ითვლება ნამდვილ პლანეტად.

სტერნისა და გრინსპუნის აზრით, თუ ჩვენ ამ კრიტერიუმებით ვიხელმძღვანელებთ, შესაძლოა დედამიწაც კი არ ჩავთვალოთ პლანეტად, ვინაიდან მის ორბიტასთან ბევრი ასტეროიდია. მათი აზრით, სიტყვა "პლანეტა" უნდა გამოვიყენოთ ობიექტის გეოფიზიკური და არა ორბიტალური თვისებების მიხედვით.

"სიტყვა პლანეტას ჩვენ ვიყენებთ კონკრეტული თვისებების მქონე სამყაროების აღსაწერად. როდესაც განვიხილავთ პლუტონს, რომელსაც ბევრი ნაცნობი მახასიათებელი აქვს, მაგალითად, ყინულოვანი მთები, აზოტოვანი მყინვარები, ცისფერი ცა და სმოგის ფენები, ჩვენ ბუნებრივად მიგვაჩნია მისი პლანეტად მოხსენიება" - წერენ სტერნი და გრინსპუნი. მათი ერთ-ერთი არგუმენტია, რომ IAU ძირითადად შავი ხვრელებისა და გალაქტიკების შემსწავლელი ასტრონომებისგან შედგება, რომლებიც პლანეტარული მეცნიერებების ექსპერტები არ არიან და, შესაბამისად, პლანეტის კრიტერიუმების განსაზღვრა მათი კომპეტენციის საზღვრებს სცდება.

გადაცემაში "ღამის შოუ სტეფან კოლბერტთან ერთად" ფიზიკის როკვარსკვლავი ნილ დეგრას ტაისონიც კი აღნიშნავდა, რომ პლუტონი არაა პლანეტა, ვინაიდან, მისი ორბიტა ზოგჯერ კვეთს ნეპტუნის ორბიტას, რაც წესიერ პლანეტას არ შეეფერება.

ერთი რამ ცხადია - პლუტონის პლანეტობის საკითხზე დავა ჯერ ნამდვილად არ დასრულებულა.