პრემიერ-მინისტრმა გიორგი კვირიკაშვილმა 10 მაისის მთავრობის სხდომის გახსნისას ნარკოპოლიტიკაზე ისაუბრა. პრემიერის თქმით, სახელმწიფო იქნება ძალიან მტკიცე და შეუვალი ნარკოტრაფიკთან, ნარკოტიკების რეალიზატორებთან მიმართებაში:

"რა თქმა უნდა, მომხმარებლების, იმ ადამიანების მიმართ, რომლებსაც ეს უბედურება და სენი სჭირთ, სახელმწიფო უნდა იყოს უფრო ჰუმანური, მაგრამ, მეორე მხრივ, სახელმწიფო უნდა იყოს მტკიცე რეალიზატორებთან მიმართებაში. ჩვენ აბსოლუტურად მკაფიო გზავნილი უნდა გავუგზავნოთ ნარკორეალიზატორებს, რომ ამას ვერასოდეს შევეგუებით".

პრემიერის განცხადებით, ბოლო პერიოდში მომხდარი უბედური შემთხვევების დაკავშირება ახალი ნარკოკანონმდებლობის მიღებასთან, არანაირ კავშირში არ არის.

კვირიკაშვილის განმარტებით, უწყებათაშორისი ჯგუფის, მთავრობის, პარლამენტისა და არასამთავრობო ორგანიზაციების საკანონმდებლო ცვლილებები გათვლილი იქნება იმაზე, რომ სახელმწიფომ უფრო კონკრეტული და მკაფიოდ გასაგები გარემო შექმნას მოხმარებასთან დაკავშირებით:

"რა დოზებია, რაც მოხმარებას უკავშირდება, რომელი დოზები ითვლება უკვე რეალიზაციად, როგორ დგინდება რეალიზაციის ფაქტები, რა მექანიზმებს შექმნის სახელმწიფო ფსიქო-სოციალური რეაბილიტაციის კუთხით და ა.შ".

პრემიერმა მოუწოდა მთავრობის ყველა წევრს, ცნობილ ადამიანებს, სპორტსმენებს, მეცნიერებს, ხელოვნებისა და კულტურის სფეროს წარმომადგენლებს, რომ კამპანია წამოიწყონ ნარკოტიკების წინააღმდეგ.