ქართული წარმოების პრეზერვატივ აიისას მფლობელი, ანანია გაჩეჩილაძე ამბობს, რომ მას სასამართლოს მიერ რელიგიური გრძნობების შემლახავად მიჩნეული პრეზერვატივის ამოღება არ დასჭირდება. გაჩეჩილაძე სასამართლოს გადაწყვეტილების შესახებ On.ge-ს ესაუბრა.

"14-მდე ვინ გააჩერებს მაგას, იყიდება 5 წუთში. ახლა, მაგ სამ დიზაინს ათ ლარს, ექსკლუზიურ ფასს დავადებ და ვიტყვი, რომ შემდეგ ჯერამდე მოასწარით თქო".

თბილისის საქალაქო სასამართლოს მოსამართლის, ლაშა თავართქილაძის გადაწყვეტილებით, პრეზერვატივების მწარმოებელი კომპანიის, აიისას რეკლამა არაეთიკურია. გაჩეჩილაძე ამბობს, რომ საქმის განხილვის დროს მოყვანილი იყო არგუმენტები, რომ ფერები წითელი, ცისფერი, ყვითელი არის ზეციური. მისივე ინფორმაციით, წითელი ფერი მოხსენიებული იყო, როგორც სამეფო ტანისამოსისთვის დამახასიათებელი ფერი, აქედან გამომდინარე კი დაასკვნეს, რომ დიზაინი ადამიანისთვის შეიძლება იყოს შეურაცხმყოფელი და ჰქონდეს რაიმე სიმბოლური დატვირთვა.

"დავა არის დიზაინებზე: "სამეფო კარის თამაშები ძლევაი საკვირველი", რომელიც მონარქთა კოლექციის ნაწილია და კიდევ ჯგუფ "პანდას" ინტელექტუალურ საკუთრებაზე, დიზაინზე "ჩამოვკრავდი მაგრამ ნათლისღებაა", რომელიც არ ყოფილა გაყიდვაში და მხოლოდ პოსტერია", - ამბობს აიისას მფლობელი.

აიისას პრეზერვატივების შეფუთვის გამო თბილისის მერიას ჰომოფობიური და ქსენოფობიური განცხადებების მქონე პარტია ქართულმა იდეამ მიმართა. პარტიაში მიიჩნევდნენ, რომ შეფუთვაზე გამოსახული ორთითზეწამოცმული პრეზერვატივი მათ რელიგიურ გრძნობებს ლახავდა. ეს არგუმენტი გაიზიარეს თბილისის მერიაში და ადამინისტრაციულ სამართალდარღვევათა ოქმი სასამართლოს გადაუგზავნეს.

ამავე თემაზე: