როცა ტელეფონი ჯდება, ბევრი ჩვენგანის განწყობა ნამდვილად ფუჭდება, მაგრამ მაინც როგორ და რატომ ხდება ასე?

ბრიტანელი მეცნიერების კვლევები და ყოველგვარ სოციოლოგიურ გამოკითხვები იქით იყოს და გადავწყვიტე საკუთარ გამოცდილებაზე მესაუბრა. გამოცდილებაზე, რომელიც საშინლად მიფუჭებს გუნება-განწყობილებას.

ის ადამიანები უფრო მარტივად გამიგებენ, რომლებიც ახალ თაობას ეკუთვნიან და სისხლის მაგივრად ძარღვებში ლამის ვაიფაი უჩქეფთ.

დავაკვირდი და სახლიდან გასულს ხშირად და მარტივად მეცვლება ხასიათი, თანაც რის გამო? ვიგებ, რომ ჩემი ტელეფონი ბოლომდე არ დამიტენია და თავი ცივილიზაციას მოწყვეტილი, ეული ჰომინიდი მგონია.

თუ ამ ყველაფერს ციფრებსა და პროცენტებში გადავიყვანთ, სიტუაცია დაახლოებით ასე ვითარდება:

100%

აღარც კი მახსოვს მთლიანად დამუხტული ტელეფონით სახლიდან ბოლოს როდის გავედი, მაგრამ როდესაც ეს ბედნიერება მოხდა, თავი სამხრეთ კავკასიის მმართველი და მსოფლიოში საუკეთესო სმარტფონის პატრონი მეგონა.

84%

ფოტო: giphy

4G ინტერნეტის გამოყენებასთან ერთად, ამბიციებიც კლებულობს და მიწაზე დაშვების სასიამოვნო პროცესი იწყება, სასიამოვნო-მეთქი იმიტომ ვამბობ, რომ ენერგიის 84% ჯერ კიდევ შენს ხელთ არის და კმაყოფილი სახით წარმოიდგენ სასიამოვნოდ გატარებულ ერთ მთლიან დღეს, როდესაც სიტყვა "დამტენის" გახსენებაც კი არ დაგჭირდება.

69%

ფოტო: giphy

ამ ციფრის დანახვასთან ერთად, სიცილითა და მეგობრებთან სკრინების ყრით გულს რომ იჯერებ, "იიი ნახე ეკრანზე 69 გამომესახა". ამ დროს უნდა მიხვდე და გააანალიზო, რომ საქმე სასაცილოდ ნამდვილად აღარ გაქვს.

41%

ფოტო: giphy

ტვინში სრული მობილიზაცია ცხადდება და სპონტანურად ვირტუალური სია იქმნება, რომელშიც წერია აკრძალული ფუნქციებისა და აპლიკაციების ჩამონათვალი, რომლებიც შედარებით დიდი რაოდენობით ენერგიას მოითხოვს და უმოწყალოდ ცეცხლზე ნავთს ასხავს. როგორიც არის ინტერნეტი, ფოტო-ვიდეო გადაღება, ინსტაგრამზე ვიდეოების ყურება და ა.შ ასეთ დროს ეკრანის განათების დაწევაც საკმაოდ ეფექტურია.

18%

ფოტო: giphy

ძალიან ცუდ ხასიათზე ვდგები, რადგან უკვე ნახსენებ ცივილიზაციას გაცილებით მკრთალ და უღიმღამო ფერებში ვხედავ. ლოგიკურიც არის, რა ფასი აქვს 21-ე საუკუნის ტექნოლოგიურ მიღწევებს თუ სახლში მისვლამდე გამეთიშა და ვეღარც გამოვიყენე.

1%

ფოტო: giph

რამხელა ტკივილს მაყენებს მომაკვდავი ტელეფონის დანახვა, უკვე ამაზე ლაპარაკიც კი ზედმეტია. ასევე საკუთარი გამოცდილებით ჯობია გირჩიოთ, რომ თუ ტელეფონის დაცლასთან ერთად თქვენი გაწყობაც ფუჭდება, მის დამუხტვას გაცილებით დიდი დრო დაუთმეთ ან სიტუაცია სხვა უფრო კომფორტული მოწყობილობებით გამოასწორეთ, მაგალითად ენერგიის ბანკით, რომელსაც ყველგან ატარებთ.