საქართველოს პრემიერ-მინისტრმა, გიორგი კვირიკაშვილმა მედიას პრესის თავისუფლების დღე მიულოცა და სთხოვა მხოლოდ პრობლემებზე არ ისაუბრონ:

"მინდა, თხოვნით მივმართო მედიის წარმომადგენლებს - ჩვენს მოქალაქეებს სჭირდებათ როგორც პრობლემებზე, ასევე პოზიტივზე საუბარი. ხვალინდელი დღის იმედი არის აბსოლუტურად მატერიალური. ის ამოძრავებს ეკონომიკას, ინვესტიციებს, ადამიანებს გრძელვადიანი განვითარების პერსპექტივაზე პოზიტიურ მოლოდინებს უქმნის და ძალიან მნიშვნელოვანია, ჩვენს ქვეყანაში ასეთი მოლოდინები არსებობდეს, მით უმეტეს, რომ მათ ამისთვის აბსოლუტურად ობიექტური საფუძველი აქვთ", - განაცხადა პრემიერმა.

პრემიერის თქმით, საქართველოში უმნიშვნელოვანესი ცვლილება მოხდა მედიის თავისუფლების კუთხით, რასაც რეპორტიორები საზღვრების გარეშეს ანგარიში ადასტურებს, რომელშიც საქართველო 105-ე ადგილიდან 61-ე ადგილზე გადავიდა.

"სხვათა შორის, ვუსწრებთ არაერთ ევროპულ სახელმწიფოს და მგონია, რომ ეს არის ძალიან მნიშვნელოვანი, რათა ჩვენს მოქალაქეებს ჰქონდეთ დამოუკიდებელი და ობიექტური ინფორმაცია", - აღნიშნა პრემიერმა.

3 მაისი თავისუფალი პრესის მსოფლიო დღეა.