მეცნიერებმა პერუში "ბნელი საიდუმლოს" მტკიცებულებები ნახეს. ამის შესახებ CNN წერს. გამოცემის ცნობით, მეცნიერებმა, ქვეყნის ჩრდილოეთ ნაწილში, სულ მცირე 140 ბავშვისა და 200 პატარა ლამას ჩონჩხი იპოვეს.

National Geographic - ის ექსკლუზიურ სტატიაში წერია, რომ ეს შესაძლებელია მსოფლიო ყველაზე მასშტაბური ბავშვთა მსხვერპლშეწირვის მტკიცებულება იყოს. არქეოლოგიური გათხრების დროს მხოლოდ ერთი მამაკაცისა და ორი ქალის ჩონჩხი იპოვნეს.

მეცნიერები ვარაუდობენ, რომ მსხვერპლშეწირვა 550 წლით ადრე, იუნესკოს კულტურული მემკვიდრეობის ძეგლების სიაში მყოფი ადგილის ჩან ჩანის მახლობლად მოხდა, სადაც ამ დროისთვის თანამედროვე ქალაქი ტრუჯილო მდებარეობს.

ფოტო: NationalGeographic

ბავშვების ასაკი 5-დან 14 წლამდე მერყეობდა, ხოლო ლამები მაქსიმუმ 18 თვის იყვნენ.

"გათხრების ადგილას გვხვდება, როგორც ბავშვების ისე ცხოველების სხეულის ნაწილები", - ნათქვამია სტატიაში.

გამოცემის ცნობით, ბავშვებს სახეზე ესვათ წითელი პიგმენტი, რომელსაც იყენებდნენ მსხვერპლშეწირვის ცერემონიაზე იქამდე სანამ მკერდს გაუჭრიდნენ და გულს ამოიღებდნენ.

National Geographic წერს, რომ ბავშვები სახით დასავლეთისკენ იყვნენ მიმართულები.

ადგილზე, სადაც ბავშვებსა და ჩვილებს მსხვერპლად წირავდნენ, არქეოლოგიური გათხრები 2011 წლიდან მიმდინარეობს.