Twitter-ზე ელვის სისწრაფით იზრდება ჰეშტეგის #idamistiyorum პოპულარობა, რაც ქართულად ნიშნავს "მე მინდა სიკვდილით დასჯა". აღნიშნული ჰეშტეგი ტვიტერის მომხმარებლებმა უკვე 55 ათასჯერ გამოიყენეს და ეს რაოდენობა ყოველ წამს იმატებს.

მოქალაქეები მოითხოვენ, რომ სიკვდილით დასჯა აღდგეს ამბოხების მომწყობთა დასასჯელად.

ამის პარალელურად, ხელისუფლებაში მყოფი სამართლიანობისა და განვითარების პარტიის ხელმძღვანელის მოადგილის, მეჰმეტ მეზინოღლუს თქმით, ხელისუფლება სიკვდილით დასჯის აღდგენის შესაძლებლობას განიხილავს.

მიუხედავად იმისა, რომ თურქეთის ხელისუფლებამ სტრატეგიული ობიექტების დიდ ნაწილზე, მათ შორის ხიდებზე, ტელევიზიებსა და პარლამენტზე კონტროლი აღადგინა, საფრთხე ბოლომდე განეიტრალებული არ არის. როიტერის ინფორმაციით, შეტაკებები ამ დრომდე გრძელდება ანკარაში, მთავარი სამხედრო შტაბ-ბინის მიმდებარე ტერიტორიაზე, სადაც გამაგრებულია ამბოხებულთა ნაწილი.

ბოლო მონაცემებით, სამხედროთა ჯგუფის მიერ ხელისუფლების დამხობის მცდელობას 60 ადამიანი ემსხვერპლა, 1 000–ზე მეტი დაშავდა, დაკავებულია 750–ზე მეტი პირი, მათი უმრავლესობა კი სამხედროები არიან.