თურქეთში 15 ივლისს გვიან დაწყებული გადატრიალების მცდელობა, არსებული ინფორმაციით, უშედეგოდ დასრულდა. ძალაუფლება კვლავ პრეზიდენტ რეჯეპ ტაიპ ერდოღანის მთავრობის ხელშია, თუმცა, ანკარაში მაინც რჩება მცირე მასშტაბის დაძაბულობის კერები და შეტაკება ამ დრომდე გრძელდება.

დაღუპულთა რაოდენობამ 60–ს მიაღწია, სულ დაკავებულია 750–ზე მეტი სამხედრო, მათ შორის არიან გენერლები და სხვა მნიშვნელოვანი სამხედრო პირები. სამართალდამცავებმა ასევე დააკავეს თურქეთის საზღვაო ძალების ადმირალი.

დაკავებული ამბოხებული სამხედროები თურქეთის პარლამენტში.

ერდოღანმა მოსახლეობას მხარდაჭერისა და ქუჩაში გამოსვლისკენ მოუწოდა. შეტყობინება დახმარების შესახებ მოქალაქეებს ტელეფონზეც მიუვიდათ. BBC ანკარაში მომუშავე ჟურნალისტ პიერო კასტელანოზე დაყრდნობით წერს, რომ ქალაქის ძირითადი ქუჩები და მოედნები ხალხითაა სავსე.

"ეს იყო მოულოდნელი, რადგან თურქი სამხედროები მოსახლეობის ძლიერი მხარდაჭერით სარგებლობდნენ მუდამ, თუმცა ხალხი შოკირებულია იმ ფაქტით, რომ მათ მოქალაქეებს ცეცხლი გაუხსნეს".

სამართალდამცავებმა კონტროლი აღადგინეს აეროპორტებზე, ხიდებზე, ტელევიზიებსა და პარლამენტის შენობაზე, რომელიც წუხანდელი შეტაკებების შემდეგ მნიშვნელოვნად დაზიანდა.

სამხედროები, რომლებსაც ბოსფორი სრუტეზე არსებული ხიდი რამდენიმე საათით დაკავებული ჰქონდათ, სამართალდამცავებს ჩაბარდნენ.

სამართალდამცავებმა და მოქალაქეებმა მეამბოხეებისგან გაათავისუფლეს ტელეარხ CNN Turk–ის ოფისი, რომელიც აჯანყებულთა შეჭრის გამო რამდენიმე საათით ეთერიდან გათიშეს. ამჟამად მაუწყებლობა აღდგენილია:

მოსახლეობა ქუჩებში თურქეთის დროშებითაა გამოსული. როგორც სტამბოლში მცხოვრებმა ერთ–ერთმა ქართველმა On.ge-ს განუცხადა, სტამბოლში ამ წუთებში მეტ–ნაკლებად სიმშვიდეა, ცხოვრება ჩვეულ რიტმს უბრუნდება, თუმცა დაძაბულობაა ანკარაში.

სტამბოლის ქუჩები ერდოღანის მოწოდების შემდეგ:

მას შემდეგ რაც ამბოხებული სამხედროები თურქეთის ქუჩებში გამოვიდნენ, მოსახლეობის ნაწილი მათ შიშველი ხელებით აღუდგა წინ, მათ არაერთი სამხედროს განიარაღება მოახერხეს, რის შემდეგაც ფოტოები გადაიღეს ტანკებთან:

სტამბოლის აეროპორტებში ავიარეისები განახლდა. პარლამენტზე კონტროლი აღადგინა ხელისუფლებამ, თუმცა, შენობა მნიშვნელოვნადაა დაზიანებული:

წუხელვე თბილისში გაიმართა უშიშროების საბჭოს სხდომა. მთავრობის წევრები დღეს საგანგებო რეჟიმში ისევ შეიკრიბებიან. საქართველოს პრეზიდენტმა მოქალაქეებს მოუწოდა, სიტუაციის დასტაბილურებამდე თავი შეიკავონ თურქეთში მოგზაურობისგან. საქართველო–თურქეთის საზღვარზე გადაადგილება თურქეთის მიმართულებით მხოლოდ საქართველოს მოქალაქეებისთვისაა შეზღუდული.