"ის ბრუნდება პოლიტიკაში და დაიკავებს შესაბამისი ფორმალური პროცედურების გავლის შემდეგ პარტიის თავმჯდომარის თანამდებობას", - ირაკლი კობახიძის თქმით, ბიძინა ივანიშვილის პოლიტიკაში დაბრუნებას პარტიაში ხშირად განიხილავდნენ და ეს აუცილებელია მათ გასაძლიერებლად.

ირაკლი კობახიძემ აღნიშნა, რომ ქართული ოცნების ევროპული ტიპის პოლიტიკურ გაერთიანებად ჩამოსაყალიბებლად განსაკუთრებული ძალისხმევა და რესურსია საჭირო, სწორედ ამიტომ ივანიშვილი რეფორმების ახალ ტალღას ჩაუდგება სათავეში.

კობახიძის თქმით, ივანიშვილი მხოლოდ პარტიის თავმჯდომარედ განიხილება და მთავრობაში მმართველ პოზიციებზე ცვლილებები არ იგეგმება.

დღეს, 26 აპრილს, პრემიერმა გიორგი კვირიკაშვილმა განაცხადა, რომ პარტიის დამფუძნებელი, ბიძინა ივანიშვილი ქართული ოცნების თავმჯდომარე გახდება.

ბიძინა ივანიშვილმა ქართული ოცნება 2012 წელს დააფუძნა და პირველი ოქტომბრის საპარლამენტო არჩევნებით, პოლიტიკურმა ძალამ ერთიანი ნაციონალური მოძრაობის მმართველობა ჩაანაცვლა.

2015 წელს, ბიძინა ივანიშვილი გურია NEWS ინტერვიუში ამბობდა, რომ იმ შემთხვევაში დაბრუნდებოდა, თუ რაიმე საოცრება მოხდებოდა ხელისუფლებაში.