პრემიერ-მინისტრის გიორგი კვირიკაშვილის განცხადებით, მათ პარტიის დამფუძნებელს, ბიძინა ივანიშვილს შესთავაზეს, რომ დაბრუნდეს და ისევ ჩაუდგეს სათავეში გუნდს. როგორც პრემიერმა თქვა, ივანიშვილი მათ შეთავაზებას დათანხმდა.

"ყველასთვის ნათელია, თუ რამდენად დიდია ჩვენი გუნდისთვის მისი დამაარსებლის, ბატონი ბიძინა ივანიშვილის ფაქტორი. მას ყველაზე მეტად ძალუძს გააძლიეროს მთავარი პოლიტიკური ბირთვი პარტიის თავმჯდომარის რანგში. შესძინოს მეტი და ახალი დინამიკა შემდგომი განვითარებისთვის, მეტი ეფექტურობისთის და პროგრესისთვის, როგორც აღმასრულებელ, ისე საკანონმდებლო ხელისუფლებას და თვითმმართველ ორგანოებს".

პრემიერის თქმით, უახლოეს დღეებში გაიმართება პარტიის პოლიტსაბჭოს სხდომა და ყრილობა:

"როგორც პოლიტსაბჭო და ასევე მთელი საქართველოდან წარმოდგენილი დელეგატები, ერთხმად აირჩევენ ბიძინა ივანიშვილს ახალ თავმჯდომარედ. ასევე აირჩევენ პოლიტსაბჭოს ახალ შემადგენლობასაც".

ბიძინა ივანიშვილი პოლიტიკიდან 2013 წელს წავიდა. ქართული ოცნება-დემოკრატიული საქართველოს ლიდერის პოსტზე ბიძინა ივანიშვილ მაშინ ირაკლი ღარიბაშვილმა შეცვალა.

მაშინ ივანიშვილმა პოსტის დატოვებას, არა პოლიტიკიდან წასვლა, არამედ უფრო რთულ და საზოგადოებისთვის საჭირო ადგილას გადასვლა უწოდა. ის ამბობდა, რომ სამოქალაქო სექტორის განვითარებისთვის, აქტიურ საზოგადოებრივ ცხოვრებას უბრუნდებოდა, სადაც მინიმუმ 20 წლის განმავლობაში აპირებდა დარჩენას.