აზერბაიჯანში სააპელაციო სასამართლომ ჟურნალისტი აფგან მუხთარლი პატიმრობაში დატოვა. ამის შესახებ On.ge-ს მუხთარლის ცოლმა, ლეილა მუსტაფაევამ განუცხადა.

როგორც მუსტაფაევა ამბობს, წინა დღეს მათ გაიგეს, რომ აზერბაიჯანის ადვოკატთა ასოციაციამ მუხთარლის ადვოკატს, ნემარ ქერიმლის, ერთი წლით ლიცენზია შეუჩერა, რის გამოც სასამართლოზე მისი ქმარი დაცვის გარეშე იყო დარჩენილი.

როგორც მან On.ge-ს უთხრა, ქერიმლისთვის შესაბამისი ღონისძიებების გასატარებლად ასოციაციას გენერალური პროკურორის მოადგილემ, რუსტამ უსუბოვმა მიმართა.

მუსტაფაევას განმარტებით, უსუბოვმა საჩივრის წერილში მიუთითა, რომ ადვოკატმა მუხთარლის დაკავებაზე არასწორი აზრი ჩამოაყალიბა და ჟურნალისტის საქმეს პოლიტიკურად მოტივირებული უწოდა.

"ბაქოს საპატიმრო დაწესებულებაში აფგანის მონახულების შემდეგ, ნემატ ქერიმლი პენიტენციური დაწესებულების თანამშრომლების მხრიდან ძალადობის მსხვერპლი გახდა. თანამშრომლებმა ის ძალით გაჩხრიკეს მიუხედავად იმისა, რომ კლიენტის მოსანახულებლად მისული ადვოკატის გაჩხრეკის უფლება არ ჰქონდათ. ქერიმლის ჩამოართვეს ჩანაწერები, რომელიც მან აფგანს შეხვედრის დროს გამოართვა", - განაცხადა მუსტაფაევამ On.ge-სთან.

როგორც თვითონ ამბობს, ქერიმლის მიმართ გამოტანილი გადაწყვეტილება პოლიტიკურად არის მოტივირებული, რადგან ის ხშირად იცავს პოლიპატიმრების უფლებებს.

აფგან მუხთარლის საქმე

თბილისიდან 29 მაისს გაუჩინარებული ჟურნალისტი, აფგან მუხთარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს.

აფგან მუხთარლი თავის გატაცებაზე პასუხისმგებლობას საქართველოს პრემიერ-მინისტრ გიორგი კვირიკაშვილს აკისრებს და მიაჩნია, რომ აზერბაიჯანის პრეზიდენტის, ილჰამ ალიევის და საქართველოს ყოფილი პრემიერის, ბიძინა ივანიშვილის ბიზნესპარტნიორობის მსხვერპლი გახდა.

აზერბაიჯანის ხელისუფლების ინფორმაციით, ჟურნალისტს სახელმწიფო საზღვრის უკანონოდ გადაკვეთასა და კორუფციაში ედება ბრალი. აზერბაიჯანის სასამართლომ მას ექვსწლიანი პატიმრობა მიუსაჯა.

საქართველოში შსს-მ გამოძიება სისხლის სამართლის კოდექსის 143-ე მუხლით დაიწყო, რაც თავისუფლების უკანონო აღკვეთას გულისხმობს.