ნატოს საპარლამენტო ასამბლეის პრეზიდენტის, პაოლო ალის განცხადებით, საქართველო ნატოს წევრი გახდება, თუმცა იქამდე საჭიროა ბევრი მუშაობა, რათა გვქონდეს მეტი ნატო საქართველოში და მეტი საქართველო ნატოში. ამის შესახებ პაოლო ალიმ ნატოს საპარლამენტო ასამბლეის როუზ-როსის 97-ე სემინარზე განაცხადა.

ასამბლეის პრეზიდენტის თქმით, სასიამოვნოა, რომ საპარლამენტთაშორისო თანამშრომლობა, საქართველოს ევროატლანტიკური ინტერგაციის დაჩქარების პროცესში, ერთობლივი მუშაობის გადამწყვეტი ნაწილია.

"ასამბლეა საქართველოს მისწრაფებას ევროატლანტიკურ ოჯახში კანონიერი ადგილის დასამკვიდრებლად ყოველთვის მხარს უჭერდა. 2008 წელს რუსეთის მხრიდან საქართველოს წინააღმდეგ განხორციელებული აგრესიის შემდეგ, ასამბლეამ აგრესია და საქართველოს სუვერენიტეტისა და ტერიტორიული მთლიანობის ხელყოფა დაგმო", - განაცხადა პაოლო ალიმ.

მისი თქმით, რუსეთი განაგრძობს საქართველოს ტერიტორიების აფხაზეთისა და სამხრეთ ოსეთის რეგიონების ოკუპაციას.

"მისი აგრესია უკრაინაში, ყირიმის აგრესია არის მცდელობა საფრთხის ქვეშ დააყენოს მთელი რიგი ქვეყნების სუვერენიტეტი. კრემლი ცდილობს შეაჩეროს მისი მეზობლების ევროატლანტიკური ინტეგრაცია", - განაცხადა პაოლო ალიმ.

ის ფიქრობს, რომ ევროატლანტიკური ოჯახში სრული ინტეგრაცია გარკვეულ დროს და რეფორმების გატარებას გულისხმობს.