მეთერთმეტე დღეა, რაც სომხეთში საპროტესტო აქციები მიმდინარეობს. ერევნის მოსახლეობა 23 აპრილს, დილიდან ქუჩაშია გამოსული და ცენტრალური გამზირების გადაკეტვას ისევ ცდილობს. ინფორმაციას ადგილობრივი გამოცემა Hetq ავრცელებს.

ერთ-ერთ გამზირზე სტუდენტებს სამშვიდობო მარში ჰქონდათ, როდესაც პოლიცია მივიდა და მათი დარბევა დაიწყო. პოლიციასთან, მორიგი შეტაკების დროს რამდენიმე დემონსტრანტი საავადმყოფოში გადაიყვანეს.

13 აპრილიდან დღემდე, სომხეთში ქვეყნის ყოფილი პრეზიდენტისა და ამჟამინდელი პრემიერ-მინისტრის, სერჟ სარგსიანის, წინააღდეგ საპროტესტო აქციები მიმდინარეობს.

22 აპრილს ოპოზიციის ლიდერი, ნიკოლ პაშინიანი და სერჟ სარგსიანი ერთმანეთს შეხვდნენ. შეხვედრა სარგსიანმა პროტესტის ნიშნად მალევე დატოვა. შეხვედრიდან რამდენიმე წუთში კი ნიკოლ პაშინიანი და ორი ოპოზიციონერი დეპუტატი პოლიციაზე დაუმორჩლებლობის გამო დააკავეს. ჯამში აქციებზე 230-ზე მეტი ადამიანი დააკავეს.

აქციის დასაშლელად პოლიციამ არაერთგზის გამოიყენა წყლის ჭავლი, ხმოვანი ყუმბარები, მავთულხლართები და ხელკეტები. დაშავებულებს შორის არიან სტუდენტები და ჟურნალისტები.

სომხეთის სახალხო არტისტები, პროტესტის ნიშნად, უარს ამბობენ წოდებებსა და ჯილდოებზე, რომელიც მათ სერჟ სარგსიანმა გადასცა.

პოლიციამ განაცხადა, რომ ერევანში მიმდინარე აქციები არასანქცირებულია და მონაწილეები ვალდებული არიან დაემორჩილონ მათ მოთხოვნას დაშლის შესახებ, წინააღმდეგ შემთხვევაში კი ისინი ძალას გამოიყენებენ.