სომხეთის ოპოზიციის ლიდერი, ნიკოლ პაშინიანი ქვეყნის პრემიერთან, სერჟ სარგსიანთან შეხვედრის შემდეგ, რამდენიმე წუთში დააკავეს. დააკავეს დეპუტატები სასუნ მიკაელიანი და არარატ მირზოიანიც.

რადიო თავისუფლების ადგილობრივი ბიუროს ინფორმაციით, პაშინიანი აქციის მონაწილეებთან ერთად ერებუნის რაიონისკენ მიემართებოდა, როცა პოლიციამ გზა მავთულხლართებით გადაუღობათ.

აქციის მონაწილეებმა პოლიციის კორდონის გარღვევა სცადეს, რასაც შეტაკება მოჰყვა. პოლიციამ ამჯერადაც გამოიყენა ხმოვანი ყუმბარები და აქციის მონაწილეების ძალის გამოყენებით დაშლა სცადა.

სომხეთის ახლადარჩეულ პრემიერ-მინისტრ სერჟ სარგსიანსა და ნიკოლ პაშინიანს შორის რამდენიმეწუთიანი შეხვედრა, სარგსიანმა პროტესტის ნიშნად დატოვა.

მანიფესტაცია სომხეთში 13 აპრილს სარგსიანის მიერ როლის შეცვლის და პრეზიდენტიდან პრემიერ-მინისტრის პოსტზე გადასვლის გაპროტესტებით დაიწყო და სამოქალაქო დაუმორჩლებლობაში გადაიზარდა, როცა პარლამენტმა სარგსიანის კანდიდატურა დაამტკიცა.

აქციის მონაწილეებმა რამდენჯერმე გადაკეტეს ცენტრალური ქუჩები. პოლიციამ მათი დაშლა მავთულხლართებით, ცრემლსადენი გაზით და ხმოვანი ყუმაბრებით სცადა. ოპოზიციამ არაძალადობრივი ხავერდოვანი რევოლუცია გამოაცხადა. პროტესტანტები სარგსიანის გადადგომას მოითხოვენ.