შინაგან საქმეთა მინისტრის გიორგი გახარიას თქმით, ქართული მხარე უკვე მუშაობს არჩილ ტატუნაშვილის შინაგანი ორგანოების გადმოცემის საკითხზე. ამის შესახებ მან დღეს, 17 აპრილს, ჟურნალისტებთან საუბრისას განაცხადა:

"მთავრობა ყველა შესაძლო რესურსს გამოიყენებს. ჩვენი ძირითადი ამოცანა გახლავთ ის, რომ ექსპერტიზა რაც შეიძლება ეფექტიანი და ყოვლისმომცველი იყოს. ექსპერტიზა არის ჩვენი ძირითადი ინსტრუმენტი საგამოძიებო პროცესის ლოგიკურ დასასრულამდე მიყვანისთვის".

გუშინ, 16 აპრილს, ტატუნაშვილის ოჯახს მცხეთის პროკურატურაში დაუდასტურეს, რომ თბილისის მიერ კონტროლირებულ ტერიტორიაზე გადმოსვენებისას არჩილ ტატუნაშვილის ცხედარს ამოცლილი ჰქონდა შინაგანი ორგანოები.

სამხარაულის ექსპერტიზის ოფიციალური დასკვნა ჯერჯერობით ცნობილი არ არის.

ტატუნაშვილის საქმე

არჩილ ტატუნაშვილის ცხედარი ოკუპირებული ტერიტორიიდან გარდაცვალებიდან 26 დღეში, 20 მარტს გადმოასვენეს. ტატუნაშვილი თითქმის ერთი თვის წინ, 22 თებერვალს ცხინვალის ციხეში გაურკვეველ ვითარებაში გარდაიცვალა. ოსური მხარის ვერსიით, ის იზოლატორში გადაყვანისას პოლიციელისთვის იარაღის წართმევა სცადა, საპასუხო ძალის გამოყენების შედეგად შეუძლოდ გახდა, კიბეებზე წაიქცა და მოგვიანებით საავადმყოფოში დაიღუპა.

სახელმწიფო უსაფრთხოების სამსახურის ინფორმაციით, ოსური მხარე აცხადებდა, რომ ტატუნაშვილი ინფარქტით დაიღუპა. გარდაცვლილის ცხედარი ოკუპირებულ ცხინვალს 24 თებერვალს უნდა გადმოესვენა, თუმცა დე ფაქტო ხელისუფლებამ მაშინ პოზიცია შეცვალა.