შინაგან საქმეთა სამინისტროს ინფორმაციით, თბილისში, ბარნოვის ქუჩაზე ქალის მკვლელობის საქმეზე დაკავებულს ბრალი დაუმძიმდა.

უწყების ინფორმაციით, მას ბრალი საქართველოს სისხლის სამართლის კოდექსის 11 პრიმა და 109-ე მუხლით წარედგინა, რაც ოჯახში ძალადობის ნიადაგზე განსაკუთრებული სისასტიკით ჩადენილ მკვლელობას გულისხმობს. დანაშაული 16-დან 20-წლამდე ან უვადო პატიმრობას ითვალისწინებს.

თავდაპირველად გამოძიება 108-ე მუხლით დაიწყო, თუმცა საქმე გადაკვალიფიცირდა. დაკავებულს ახალი ბრალი რამდენიმე წუთის წინ წარედგინა. ბრალდების მხარე სასამართლოში აღკვეთის ღონისძიების სახით პატიმრობას მოითხოვს.

ამავე საქმეზე დანაშაულის შეუტყობინებლობის ბრალდებით ერთი პირი დააკავეს.

მკვლელობა თბილისში, ბარნოვის ქუჩაზე 13 აპრილს მოხდა. ყოფილმა მამინაცვალმა 25-წლამდე ქალს მცირეწლოვანი შვილების თანდასწრებით ყელის არეში სასიკვდილო ჭრილობა მიაყენა.

შინაგან საქმეთა სამინისტროს ინფორმაციით, მკვლელობამდე გარდაცვლილმა პოლიციას მიმართა და დედასთან ერთად, სავარაუდო დამნაშავისთვის შემაკავებელი ორდერის გამოცემა მოითხოვა.

მკვლელობაში ბრალდებული ოჯახის წევრებზე ძალადობისთვის იხდიდა სასჯელს. მოგვიანებით, ბრალდებული პრეზიდენტმა შეიწყალა, მას სასჯელი გაუნახევრდა და საპატიმრო დაწესებულება ვადაზე ადრე, 2017 წლის 25 მაისს დატოვა.