პირი, რომელიც ვაკეში ახალგაზრდა ქალის მკვლელობის ბრალდებით დააკავეს, ძალადობისთვისაა ნასამართლევი.

შსს-ს ცნობით, 2015 წელს ის დამნაშავედ სცნეს ოჯახის წევრის ჯანმრთელობის მძიმე დაზიანებასა და ტრანსპორტის მოძრაობის უსაფრთხოების წესის დარღვევაში. მოგვიანებით, ბრალდებული პრეზიდენტმა შეიწყალა, მას სასჯელი გაუნახევრდა და საპატიმრო დაწესებულება ვადაზე ადრე, 2017 წლის 25 მაისს დატოვა.

გამოძიებამ დაადგინა, რომ მიმდინარე წლის 13 აპრილს ბრალდებული ვაკეში, ბარნოვის ქუჩაზე, ყოფილი მეუღლის შვილს, 1993 წელს დაბადებულ პირს სხეულზე დანით სასიკვდილო ჭრილობა მიაყენა და შემთხვევის ადგილიდან მიიმალა. 25 წლის ქალი შემთხვევის ადგილზე გარდაიცვალა.

გამოძიებით ასევე დადგინდა, რომ მკვლელობამდე რამდენიმე საათით ადრე, მოკლული და დედამისი პოლიციის განყოფილებაში გამოცხადდნენ და დედის მიმართ შემაკავებელი ორდერის გამოწერა ითხოვეს.

პოლიციაში შვილის მკვლელობის შესახებ შეტყობინება დედის მიმართ ორდერის გამოწერიდან მალევე შევიდა.

ბრალდებული დანაშაულის ჩადენიდან მეორე დღეს თელეთში დააკავეს. პოლიციამ დანაშაულის ჩადენის იარაღი - დანა, შემთხვევის ადგილიდან ამოიღო, რომელზეც დანიშნულია შესაბამისი ექსპერტიზა.

13 აპრილს, ვაკეში, ბარნოვის 77-ში ახალგაზრდა ქალს შვილების თვალწინ ყელი გამოჭრეს.