სამოქალაქო საზოგადოების წევრები რუსთავი 2-ის საქმესთან დაკავშირებით, უზენაესი სასამართლოს შენობასთან შეიკრიბნენ და საჯარო განცხადება გააკეთეს.

განცხადების ტექსტი მედიაექსპერტმა ნინო დანელიამ წაიკითხა და რუსთავი 2-ის საქმეზე, წინა ორ ინსტანციაში გამართულ "უსამართლო" სასამართლო პროცესებზე ისაუბრა:

"ივანიშვილს და მის გუნდს განსაკუთრებით აფრთხობს რუსთავი-ის მიერ 8 ოქტომბერს დაგეგმილი ეგზითფოლი და რუსთავი2-ის როლი ამომრჩეველთა ხმების დაცვის საქმეში. ამიტომ მიდის ასეთ რისკზე. ჩვენ არ ვაპირებთ, ხელისუფლებას მივცეთ შესაძლებლობა, წარგვართვას ხმა, რომელიც რუსთავი 2-დან ისმის. ჩვენ ფიზიკურად დავიცავთ რუსთავი 2-ს ხელისუფლების ძალადობისგან და არ დავუშვებთ უკანონო გადწყვეტილების აღსრულებას".

სამოქალაქო საზოგადოების სახელით, ნინო დანელიამ მესამე და ბოლო ინსტანციას, უზენაეს სასამართლოს რუსთავი 2-ს საქმის განხილვისკენ მოუწოდა:

"ამ დღეებში საქართველოში წყდება ხელისუფლებისგან დამოუკიდებელი და ერთ-ერთი ყველაზე რეიტინგული მედიის, რუსთავი 2-ის ბედი. უზენაესმა სასამართლომ უნდა გადაწყვიტოს, გააგრძელებს თუ არა არსებობას პრორუსული ნარატივისგან თავისუფალი და ყველაზე მსხვილი მედია. მოვუწოდებთ მოსამართლეებს გაიაზრონ, რომ რუსთავი 2-ის დაცვა არ არის ერთი რომელიმე პოლიტიკური ჯგუფის ინტერესი. საქართველოს თითოეული მოქალაქის ცხოვრება და კეთილდღეობა, მიუხედავად მათ პოლიტიკური გემოვნებისა, დამოკიდებულია იმაზე, თუ როგორ განვითარდება მოვლენები ამ ტელევიზიასთან მიმართებით. მივმართავთ საქართველოს უზენაეს სასამართლოს, გაითვალისწინეთ, რომ თქვენს ხელშია საქართველოს დემოკრატიული მომავალი. გთხოვთ, განიხილოთ რუსთავი 2-ის საქმე და იმოქმედოთ არა ერთი მოქალაქის ახირების, არამედ საქართველოს კანონმდებლობის, მოქალაქეების ინტერესების დაცვით".

მიმართავა ეხებოდა ასევე საკონსტიტუციო სასამართლოსაც. მათი განცხადებით, საკონსტიტუციო სასამართლოს გადაწყვეტილებაზე იქნება დამოკიდებული 2016 წლის საპარლამენტო არჩევნების ლეგიტიმაციის საკითხი:

"მივმართავთ საკონსტიტუციო სასამართოსაც, ჩვენ ვიცით, რომ საკონსტიტუციო სასამართოს ძალიან დიდი წნეხის ქვეშ უწევს მუშაობა. ვიცით, რომ მოსამართლეებზე მიმდინარებს ზეწოლა. გვესმის, რომ სასწორზე დევს მოსამართლეების პირადი უსაფრთხოება. მაგრამ, გთხოვთ, რომ მხედველობაში მიიღოთ, რომ თქვენს გადაწყვეტილებაზეა დამოკიდებული ამ ქვეყანაში 2016 წლის საპარლამენტო არჩევნების ლეგიტიმაციის საკითხი, რაც სასიცოცხლოდ მნიშნელოვანია საქართველოს თავისუფალი მომავლის უზრუნველსაყოფად".

ნინო დანელიამ პრეზიდენტის პასუხისმგებლობაზე გაამახვილა ყურადღება და განაცხადა, რომ უზენაესი სასამართლოს მოსამართლეების ქმედებებზე სწორედ ის იქნება ანგარიშვალდებული:

"მივმართავთ საქართველოს პრეზიდენტს და შევახსენებთ, რომ პოლიტიკური პასუხისმგებლობა უზენაესი სასამართლოს მოქმედებებზე მასაც ეკისრება. მოსამართლეები მისი რჩეულები არიან. საერთაშორისო საზოგადოებას კი ვთხოვთ, კიდევ ერთხელ შეახსენოს ბიძინა ივანიშვილს და საქართველოს ხელისუფლებას, რა შედეგებს მოუტანს ქვეყანას ხელისუფლების გავლენისგან თავისუფალი „რუსთავი 2-ის" დაკარგვა".

13 ივლისს, რუსთავი 2-ის გენერალურმა დირექტორმა ნიკა გვარამიამ, სპეციალურ ბრიფინგზე განაცხადა, რომ მათ უზენაესს უკვე მიმართეს საკასაციო საჩივრით და მოუწოდა სასამართლოს, წარმოებაში მიიღოს რუსთავი 2-ის საქმე.